Clyde Harms: Momentonan emotivo na un wega di e play-off di Baseball AA di 2017

E directiva di ABBA, cu Sherwin Howell como presidente e aña aki a organisa un play-off pa e campeonato di Baseball AA cu varios inovacion y e serie a resulta un exito.

Despues cu ATCO a gana e prome dos weganan, Red Machine y ATCO mester a hunga tur 7 wega pa dicidi ken ta campeon.

E ultimo wega tabata “one for the record”, un wega cu a caba te den oranan di marduga, un wega cu Red Machine tabata perde cu un score di 5 -0 y por fin a gana 12-7.

 

Entre e inovacionnan cu ABBA a efectua e aña aki tabata dunamento di homenahe na algun “baluarte” di baseball di Aruba, dunando nan e honor di haci e simbolico prome lansamento di cada wega. Pa e di cuater wega ami tabatin e placer di comparti e honor cu dos otro ex-pelotero hopi popular den nos comunidad, peloteronan cu a hunga den diferente epoca hopi despues cu ami a colga mi spikenan: Yubi Toppenberg y Richard Simon.

Nos a pasa momentonan emotivo recordando nos epoca den baseball, y intercambiando anecdotanan. Nos tur tres a wordo entrevista pa Cadochi Kock pa Facebook di ABBA lo ke tambe a yuda rebibi experiencianan cu tabata perdi den profundidad di nos memoria.

Tabata bunita di ABBA di asina recorda publico di historia di nos baseball.

 

Ami a wordo entrevista tambe pa e naradornan di e wega na radio y esaki a evoca memorianan di e XIII Serie Mundial di Baseball Amateur di aña 1952 na Havana, Cuba tempo cu pa prome biaha den historia e seleccion nacional di Aruba a participa.

Un anochi Michael Kuiperi, un miembro di e directiva di ABBA cu a bay Havana cu e ekipo y ami a haya invitacion pa wordo entrevista pa e famoso y popularisimo locutor Venezolano Pancho Pepe Croquer. Mescos cu den e stadion Crismo Angela/ Nadi Croes cu e locutornan tabata den un camber chikito y scur, Pancho Pepe tabata den un cuarto chikito y scur den e parti mas halto di e El Gran Stadium del Cerro.

 

Mi gemoed a yena tambe cu alegria ora mi a tende cu e buki cu ami a skirbi na 2002 cu ayudo di Efraim “Boei” Brion d.f.m. y Don Juan Perez, “Historia di Baseball di Aruba, e Prome Añanan” muy probablemente lo wordo imprimi e aña aki atrobe pa conmemora e di 65 aniversario di e XIII Serie Mundial. Berdaderamente, e nochi tabata yen di momento emotivo, pero e momento cu mas lo mi corda ta ora cu un cabayero a haya sa cu ta ami ta e persona cu a trece Little League Baseball na Aruba. El a dunami su man y bisa mi con orguyoso e tabata di haci conoci cu mi.

El a recorda mi cu tur e peloteronan Arubiano cu a yega Major League na Merca ta producto di Little League. El a conta mi cu e mes a hunga Little League hopi aña y e ta considera Little League algo di asina balor social y deportivo, etc., etc.

Ami a recorde cu e elogio mester bay na e centenares di hendenan cu a traha aña ‘den, aña ‘fo cu e muchanan. E coachnan, e umpirenan, e sponsornan, tur esnan cu den un manera of otro a haci cu e muchanan por a participa, esakinan ta merece tur admiracion y gratitud di nos comunidad.

 

Mi ta felicita Sherwin Howell y tur e miembronan di directiva di ABBA pa nan campeonato y play-off exitoso. Mi ta gradici nan pa e honor cu nan a duna mi di participa den e ceremonia prome cu e di citro wega. Mi ta felicita Red Machine cu nan titulo di Campeon y mi ta duna un pabien grandi na ATCO Concrete tambe cu a mustra cu nan tin tur ingrediente pa bira campeon di Aruba atrobe. Manera nos tabata bisa na Brooklyn: Wait till next year!

Top