Co-fundador di COPPPAL sr. Gustavo Carvajal a fayece

Partido MEP ta participa fayecimento di Licenciado Gustavo Carvajal Moreno, co-fundador di nos organizacion Conferencia Permanente de Partidos Politicos de America Latina y el Caribe, COPPPAL. Sr. Carvajal a fayece na Mexico.

 

Nos ta despedi di un Latino Americano cu a aporta n’e desaroyo politico di America Latina y Caribe atrabez di COPPPAL cu el a funda, cu e fin di defende democracia y institucionnan huridico politico.

Tambe cu e meta pa promove su desaroyo y perfecionamento, fortalece e principionan di autodeterminacion di e pueblonan di America Latina y Caribe, promove e proceso di integracion regional y e soberania di e paisnan di e region.

 

Sr. Carvajal tabata un amigo di sr. Betico Croes den felis memoria, y su sosten tabata instrumental pa Aruba a logra su Status Aparte na 1986.

Sr. Gustavo Carvajal a sostene lidernan di MEP sr. Nelson Oduber y sra. Evelyn Wever-Croes, y su gran amigo sr. Rudy Croes, Vice Presidente y Coordinador General di casonan Colonial pa COPPPAL.

Sr. Gustavo Carvajal a bishita Aruba varios biaha, y tabata presente n’e ultimo Congreso di partido MEP na 2015.

Gran famia di MEP lo haya su falta, y su legado lo keda como un guia pa nos.

Cu sr. Carvajal sosega na pas.

 

 

Top