Colegio Arubano a cuminsa un proceso nobo pa busca di Rector

Stichting Middelbare Onderwijs Aruba (SMOA) no a logra convence Minister di Enseñanza, Michelle Hooyboer Winklaar pa acepta e candidato cu nan a haya pa bira Rector di Colegio Arubano, no a keda SMOA otro, pa cuminsa un proceso full di nobo.

Minister Michelle Hooyboer Winklaar no a bay di acuerdo pa paga e subsidio pa por a paga e Rector, y despues cu SMOA a perde un caso sumario cu nan a entama contra e mandatario, no a keda SMOA otro di cuminsa e proceso pa haya un Rector cu mester cuminsa traha na inicio di e Aña Escolar nobo, 2017-2018.

 

Nos por a compronde cu Gobierno kier mira un yiu di tera den e funcion ey, pesey ta incomprendible cu for di tur esnan cu a solicita, SMOA no a haya uno cu e calificacionnan.

Y asina a bin cu un persona cu ta pensionado caba na Hulanda, siendo cu na Aruba tambe tin docente pensiona cu por haci e trabao.

 

For di despues cu Colegio Arubano a despidi di Rector Timmermans, SMOA no a logra haya un reemplazante, manera Gobierno lo desea.

Maske cu Presidente di SMOA, Bart Kool, si ta haya cu nan a logra haya un persona perfecto p’e funcion, pero no pa Ministerio di Enseñanza, e.o. pa motibo di su edad.

Como tal SMOA no por a sera un contracto final cu e persona cu nan a haya y selecta.

 

Gobierno na tur momento a insisti cu mester logra busca un persona local p’e funcion, siendo cu SMOA ta insisti cu esey ‘ainda’ no ta posibel.

Den e proximo posibilidad por garantiza cu un local, yiu di tera por bira Rector di Colegio
Arubano. Ban mira si tin interes awor for di nos docentenan cu ta dispuesto pa asumi e funcion aki di Rector di Colegio Arubano.

 

 

Top