Comision di Mayor y Studiantenan ta preocupa Awor cu retiro di 18 docente, continuidad y stabilidad ta core peliger na Colegio Arubano

Comision di Mayor di Colegio Arubano, pero tambe e studiantenan ta masha preocupa cu loke ta sosodiendo na Colegio Arubano, unda 18 docente a bay cu retiro.

Net awor, cu nan ta na porta di otro CP y tin studiante cu ta den nan ultimo aña escolar. Manera a ser bisa, continuidad stabilidad n’e scol ta coriendo peliger.

 

Comision di Mayor (OCCA) e siman aki a convoca un reunion cu caracter di urgencia, unda e discuti e situacion actual, sin cu SMOA a convoca reunion cu nan pa informa kico ta pasando. Ta via di medionan di comunicacion OCCA ta sigui loke ta pasando.

Asina nan por a tuma nota di retiro di 18 docenter, pa cual siman pasa, OCCA a manda un carta pa SMOA, pidiendo claridad riba kico ta pasando.

 

Un biaha mas OCCA a referi na un carta na maart 2016, cu nan a manda pa SMOA, relaciona cu retiro di e Rector Hans Timmerman, cu for di e tempo ey, situacion na Colegio a sigui deteriora.

Di acuerdo cu OCCA loke ta pasando, ta debi na falta di maneho, falta di comunicacion y OCCA no ta considera SMOA un partner serio pa discuti cu nan.

 

OCCA a manda copia di su cartanan tambe pa Minister di Enseñanza, Michelle Hooyboer-Winklaar, pero tambe pa Direccion di Enseñanza, pa Inspeccion di Educacion, pa Obispado di Willemstad, unda e.o. OCCA a cuestiona den capacidad di maneho di Colegio.

OCCA kier un dialogo habri cu SMOA, pero sin cu tuma represaya. Mester confirma cu tin continuidad y stabilidad cu mester wordo restaura, pa Colegio Arubano confirma di ta un bon scol.

 

Ora cu a spera un reaccion di Minister Michelle Hooyboer-Winklaar, a bin tende cu e ta atendiendo e di 61 Commission on the Status of Women di Nacionnan Uni na New York, encabesando e delegacion di Reino Hulandes, re-emplazando Minister Jet Bussemaker.

Minister Michelle Hooyboer Winklaar lo ta bek na Aruba, dia 24 awor, y unabes na Aruba, e lo convoca un reunion cu SMOA y OCCA.

 

Ta di spera cu porfin lo haci un limpieza na Colegio Arubano, unda sigur tin un cantidad di “apel putri” ta cana rond, cu no ta beneficia ningun studiante y sigur no Colegio Arubano.

Ta di spera cu Minister Michelle Hooyboer-Winklaar  impone su man di hero y demanda kico pa haci pa garantiza continuidad y stabilidad na Colegio Arubano.

 

 

Leave a Reply

Top