Competencia Dia di Betico pa Landamento Sincronisa un exito grandi

Diasabra 28 di januari ultimo a tuma luga e competencia di Landamento Sincronisa en conexion cu celebracion di Dia di Betico.

Atletanan di e categoria 10 aña y menos y tambe 11-12 aña, mester a cumpli cu figuranan manera e. o. Ballet Leg, Barracuda, Oceanita y Surface Prawn.

Aki den categoria di 10 aña y menos, Sofia Cardona a haya oro, Abizahi Sanchez plata y Alina Dirksz brons. Den categoria 11-12 aña oro a bay pa Mikayla Morales, Avigayle Tromp a logra gana e medaya di plata y Abigail Sanchez e brons.

 

Loke ta e categoria 13–15 anja, e atletanan mester a mustra nan dominio den e figuranan Barracuda Spinning 360, Ariana, Porpoise Spin Up 180 y Flamingo Bent Knee. Y aki oro a bay pa Kainah Croes, silver pa Sarah Silva y brons pa Meghan Tromp.

Den e categoria 16–18 aña tabatin e figuranan Barracuda Airborne Split, Porpoise Twist Spin, Manta Ray y Butterfly. Abigail de Veer a logra capta e oro, silver a bay pa Mary-Jane Wong y brons a bay pa Anastacia van Daal.

 

Despues di e competencia di figuras a bay over na competencia di solo, duet y demonstration teams.

Den e evento di Solo, den categoria 12 aña y menos nos ta haya Mikayla Morales cu oro, Avigayle Tromp cu plata y Abigail Sanchez cu brons. Den categoria 13-15 aña oro a bay un biaha mas pa Kainah Croes, y silver pa Meghan Tromp. Den categoria 16 -18 Abigail de Veer ta e unico cu a presenta un tremendo solo.

Pa e evento di duet den e categoria 12 aña y menos e duo di Mikayla Morales y Avigayle Tromp a bay cu oro y plata a bay pa e duo Abigail Sanchez y Arianna Dijkhuizen.

 

Dor cu tin solamente 1 Team den cada categoria e atletanan a duna nan presentacion di e rutina sin competi pa medaya. Esaki ta necesario pa e atletanan haya experiencia di landa e rutina y naturalmente cu e Hues nan por duna feedback p’asina por prepara nan pa e competencianan den exterior.

Tambe mester menciona cu a cuminsa prepara un Team Senior atrobe p’asina cuminsa e preparacionnan pa aña 2018 na unda e Team aki lo mester clasifica pa por participa na e Weganan PanAmericano cu lo bay ta na 2019.

 

Barracudas Aruba kier a manda palabra di pabien na tur atleta di Landamento Sincronisa y cu a participa na e competencia di Dia di Betico. Tambe un gradicimento ta bay na e coachnan Yami, Alva y Nathania pa nan pasenshi pa cu e trainingnan.

Pa wak mas potret y pa sigui mas informacion tocante Landamento Sincronisa por subi rib’e pagina di Facebook di Barracudas Aruba y riba Instagram synchro_aruba.

Top