Concentrando den area di Palm y Eagle Beach, Actividadnan di Aruba Challenge Endurance Festival a cuminsa

Diabierna mainta den e Ballroom di Hyatt Regency Resort Aruba, atletanan profesional, race directors, prensa internacional, local y otro invitadonan y sponsors, a duna inicio n’e di dos Aruba Challenge Endurance Festival.

 

Centenares di atleta, tanto local y internacional, lo participa tanto den e Fitville Caribbean Crossfit Games, e 5km Fun Run Walk y culminando cu e atraccion principal, e Half Distance Challenge Triathlon.

Algun di e paisnan represente den e actividadnan ta: USA, Colombia, Venezuela, Hulanda, Brazil, Surinam, Canada, Cuba, Costa Rica, Mexico y naturalmente Aruba.

Prensa a haya oportunidad di combersa cu e Profesionalnan, kendenan ta competi na un nivel hopi halto y ta den top condicion pa diadomingo awor.

 

Pa 6.21 am dilanti di Hyatt Regency Hotel e triathlon ta ranca sali y ta premira cu pa algo menos cu 5 ora e prome atletanan lo yega e finish line.

Nan lo cuminsa cu landamento, sigi pa core bicicleta y termina coriendo.

Diasabra mainta pa 8’or, un grupo grandi di mucha entre 7 cu 14 aña lo participa den disciplina di landamento y coremento. Esaki lo ta entre Aruba Marriott y Ritz Carlton Hotel.

Publico ta invita pa bin apoya e muchanan di diferente scol.

 

Cuminsando mainta te anochi, rib’e parkinglot di Hyatt Hotel, lo tin e Sport Expo cu diferente tienda deportivo y tambe e competencia entre atletanan di crossfit (Fit Ville Caribbean ).

Parti atardi pa 6’or lo tin e 5km Fun Walk & Run cu ta sali for di Hyatt y regresa n’e mesun sitio.

P’e evento aki ainda por registra diasabra den dia. E prijs ta solamente 20 florin y por gana varios pasashi pa exterior.

 

Tambe pa 6 or e festival di musica y cuminda ta cuminsa.

Diasabra lo tin N Fuzion, Joyride, PHATTUNEZ y Dj Vibes.

Tambe lo tin 7 restaurant delicioso presente. Tur esaki completamente gratis.

Diadomingo mainta lo start cu e Triathlon y atardi lo entrega premio pa 5’or.

Despues lo clausura e fin di siman cu e banda di reggae Kawura y e famoso banda Tsunami. Tambe lo tey Music Monks y Dj Version.

Remarcabel pa menciona cu diferente personanan influyente di exterior cu ta presente na Aruba pa cubri e evento riba media y rednan social.

Un di nan cu a capta hopi atencion ta yegada di Matteo Carvajal Correa. E ta ganador di e programa popular El Desafio Super Humanos hunto cu Melina Ramirez.

Hunto nan tin miyones di ‘followers’ cu lo conoce Aruba di serca.

E pro’s cu tabata presente n’e conferencia di prensa tabata Jessica Santos, Davide Giardini, Andy Potts, Cody Beals, Brad Williams y Aj Baucco.

Top