Concierto Dominical Donny Lacle cu un dushi mainta cu diferente musico hoben y grandi

Riba diadomingo prome di october, a tuma luga e Concierto Dominical Donny Laclé, den Biblioteca Nacional na Playa.

Un biaha mas e comision organisador a, logra hinca un programa hopi varia den otro, cu dos grupo “nobo”.

 

E concierto a cuminsa cu presentacion di Vivian Lampe, compaña pa Denzil Tromp, un hoben di 14 aña cu ta toca conga y a sinti su mes masha honra di por presenta hunto cu Vivian.

Hunto cu nan, un musico cu semper ta cla pa duna un man, esta Carlos Bislip riba wiri.

Nan a presenta musica “Aura”, “Arubanita”, “Mi Esposa” y naturalmente tambe pieza di Padu: “Fo’i dia mi a mirabo” y “Abo so”.

Un aplauso grandi a  recompensa pa nan bunita presentacion. y tempran caba algun pia a kishiki.

 

Durante un pausa cortico, e caha di glas a pasa rond.

Nos ta gradici esnan presente cu na un manera generoso a haci un donacion.

Fin di november diferente hoben talento musical lo ta contento di por ricibi, por medio di e donacionnan, un scholarship pa yudanan paga nan lesnan di musica.

 

Di dos actuacion tabata na encargo di un grupo nobo: Duo Max y Julia.

Max Hassel cu ta un bon guitarista y cantante, ta conoci cerca mayoria di nos y tambe na hopi pais den exterior.

Julia Wever, durante 20 aña miembro di e coro di misa San Francisco, awo tin dos aña ta forma duo cu Max. Julia su bunita stem a encanta e publico. Tambe su interaccion cu e publico tabata tremendo, y nan a hasta pone diferente pareha subi pista.

Nan repertorio tabata hopi varia, di diferente compositor, entre otro: “Toch mi sa”, “Si mi cama por a papia”, “Cunucu di Seit”, “En mi Viejo San Juan”.

 

El Nuevo Sabor Musical a cera e concierto.: Tur 6 tocador tabata integrante di diferente banda aki na Aruba y nan a dicidi di bin hunto pa pone ambiente p’e publico. Y berdaderamente na a pone esey diadomingo, pa esnan den Café Musical na biblioteca                                                                                                                                      E publico a canta manera un coro y a los e pianan rib’e zonido y ritmo di entre otro:“Ami so den boso”, “Sabor a mi”, ”De ti enamorado”, ‘’Bin cerca mi”, “Pilar”.

 

Comision organisador ta mira bek riba un otro concierto exitoso y ta gradici Vivian, Denzi y Carlos; Duo Max Y Julia y El Nuevo Sonido Musical, pa nan dushi presentacion.                                                                                                                                        E MC a gradici e publico cu a bin presencia e concierto aki y cu a contribui cu nan donacion.                                                                                                                                             E siguiente Concierto Dominical lo tuma luga dia 29 di october 2017.

Leave a Reply

Top