Concierto Dominical “Donny Laclé” na Biblioteca Nacional Aruba

Ya caba ta un custumber pa masha hopi hende, cu e ultimo diadomingo di luna nan ta bay Café Musical, na Biblioteca na Playa, pa disfruta di un mainta ameno, yena cu bon musica y un ambiente masha agradabel.

 

Dia 25 di juni awo, lo no ta diferente. E diadomingo aki lo ta atrobe masha special.

Tur presente lo disfruta di dos ora yena cu bon musica, presenta pa diferente grupo entre nan algun talento hoben di Scol di Musica Rufo Wever di cua algun ta disfrutando di un scholarhip di Fundacion Donny Laclé, cu a sali for di e “famoso” caha di glas.

 

E programa ta habri cu presentacion di e siguiente studiantenan di Scol di Musica Rufo Wever: riba piano Carienne de Cuba y Ivan Ponson; un ensemble chikito consistiendo di Terrence Thomas, Alfonso de Windt, Duane Amedee, Ivan Williams y Daniel Werleman; un otro ensemble chikito consistiendo di Chris Loefstop, Daniel Werleman, Lidrick Solognier, Denzil Tromp y Justin Peña.

Despues Anuar Muyale lo duna un presentacion riba un instrumento di supla cu ta poco conoci. Y lo conta un tiki di esaki. Cua instrumento? Bin mira y bin scucha!

 

Nel Scholten, un musico cu sigur pa hopi di e bishitantenan fiel ta conoci: un tremendo tocado di steelpan pa mas cu 50 aña. Nel tin un repertorio enorme riba tur clase di musica.                                                                                                         Nos ta termina e mainta cu Paranda di famia Figaroa, un grupo consistiendo pa gran parti di famia Figaroa, adulto y hoben, dirigi pa Tommy y Linda Figaroa, cu sigur lo percura pa e dushi ambiente bailabel cu semper ta reina na final di nos diadomingo mainta.

 

E concierto aki ta priminti di bira hopi varia y anima. Pues, reserva bo diadomingo mainta.

E concierto ta di 11’or pa 13’or; entrada ta gratis, pero manera semper lo pasa rond cu e caha di glas pa tur presente por haci un donacion, cu fin di aña lo beneficia diferente di nos hoben talentonan musical den nan studio. Sinti bo Bon Bini!

Top