Conocido rapper “Becholize” Kopra a wordo likida ayera marduga

 

WILLEMSTAD – Diahuebs 19 di januari 2017, alrededor di 2:35am, Central di Polis a dirigi un patruya na Lindberghweg, despues di a ricibi informacion cu desconocinan den un vehiculo mester a los varios tiro dirigi riba un homber.

E patruya cu a yega na e sitio a topa cu e homber victima cu varios herida di bala rond di su curpa cu no tabata duna señal di bida.

 

For di un investigacion preliminar cu Polis a realisa na e sitio a resulta cu e victima tabata para hunto cu mas persona ta combersa. Diripiente varios persona den un auto shinishi a core yega y basha bala dirigi rib’e victima.

Durante di e tiroteo aki un otro persona cu tabata hunto cu e victima a ricibi herida di bala na su brasa drechi. Presentenan a hiba e homber victima K.G.R. di 19 aña di edad pa policlinica di SEHOS pa tratamento medico. Un vehiculo cu tabata para den e cercania tambe a haya dos perforacion di bala.

 

Dokter di Polis a constata morto di e homber Edrich Kopra naci na Corsou dia 26 di september 1991 y riba ordo di Fiscal di Ministerio Publico a confisca e curpa pa mas investigacion. Polis a confisca tanto e vehiculo di e victima como esun cu a haya perforacion di bala pa mas investigacion.

Edrich ta un conocido rapper bou e nomber “Becholize”. Di acuerdo cu otro fuentenan, e caso ta relaciona cu un problema cu a cuminsa for di aña pasa y a termina den un likidacion ayera marduga.

 

Continuando cu e investigacion, riba caminda pa rotonde Zegu direccion pa aeropuerto tabatin un SUV na candela parecido na esun cu tabata envolvi den e tiroteo, Polis a confisca e frot pa mas investigacion. E investigacion den e caso aki ta continua.

Top