Conscientisacion pa epilepsia, un tema dificil: Minister Michelle Hooyboer a expresa admiracion pa alumnonan di Rayo di Solo Kleuterschool

 

Diabierna mainta, e mandatario encarga cu e cartera di enseñansa, Minister Michelle Hooyboer-Winklaar, a bishita Rayo di Solo Kleuterschool pa un ocacion hopi special y importante, esta e conmemoracion di Purple Day.

Ta conmemora Purple Day tur aña internacionalmente y na Aruba, riba Dia Mundial di Epilepsia.

 

Na Aruba a scoge un kleuterschool p’e programa di conscientisacion rond di e dia aki y un evento special riba e dia mes.

Rayo di Solo Kleuterschool e aña aki a presenta un programa cu canto y obranan di arte cu e muchanan mes a traha inspira riba loke nan a siña tocante di e trastorno neurologico aki.
Fundacion Epilepsia Aruba a zorg tambe pa un treat di cupcake y hunto cu e alumnonan a laga blaasnan di color biña los pa completa e experiencia cu nan a siña asina tanto di dje.

Minister Michelle Hooyboer-Winklaar a expresa admiracion p’e studiantenan cu a demostra un biaha mas cu na un edad asina hoben nos muchanan por compronde un tema hopi dificil y sa con pa tuma topiconan manera epilepsia hopi na serio.

E muchanan, e mandatario ta comenta, a siña kico e sintomanan di e condicion aki ta, y primordialmente a capta e mensahe importante di aceptacion, comprension y asistencia; cu nan ta compronde cu no tur hende ta mescos y cu nan ta acepta otronan cu tin condicionnan cu por ta dificil pa compronde.
Minister Michelle Hooyboer-Winklaar a agrega cu e parti di conscientisacion ta escencial y e alumnonan sa awor di e existencia di e trastorno y sa cu ta bon pa brasa, duna cariño y yuda esnan cu tin e enfermedad pa confront’e.

E docentenan a trece e tema dilanti hunto cu Fundacion Epilepsia Aruba na un forma cu e alumnonan asina jong por compronde.

Na edad jong aki ta planta e informacion den nan, nan ta crece cune y ora nan bira mas grandi nan ta comparti loke nan a siña cu otronan, e ta splica.
Tabata un evento sumamente bunita, Minister Hooyboer-Winklaar a conclui bisando, di por a mira temanan asina biba den un populacion asina jong y cu aki poco aña, na midi cu nan ta crece, lo contribui na haci un diferencia den nos comunidad.

 

 

Top