Conseho di Minister a aproba pa 16 area wordo declara areanan protehi

Gobierno recientemente a tuma e decision den Conseho di Minister pa a termino corto declara un 16 area di Aruba como reservanan natural via di un decreto Gubernamental.
Segun AWEMainta por a compronde, e organisacion Aruba Birdlife Organization a wordo poni na altura di e decision aki.

E decision aki a wordo tuma, ta ser bisa, entre otro teniendo na cuenta cu interes general di naturalesa, Gobierno mester percura pa proteccion di e areanan aki. Gobierno di Aruba mester percura pa proteccion di naturalesa, uzando fondonan publico, pero tambe pa proteha habitat di especienan den menasa di extinction pero tambe matanan cu ta den peliger di bay perdi pa semper. Gobierno mester percura pa bon condicion pa nan biba y sigui crece.

Pero tambe Gobierno mester percura pa e leynan necesario pa hende(nan) den nan forma di actua ta tene cuenta cu interes di naturalesa. Ta papia principalmente aki di e condicionnan cu mester pone pa percura pa un biodiversidad duradero. Pues percura cu tin condicionnan pa uza e terenonan aki, evita cu nan ta sufri daño y hiba un maneho di proteccion.

Gobierno a bini cu e decision aki basa riba mocion nr. 5 cu a wordo acepta den Parlamento riba 6 di februari, 2014, unda cu nan a pidi pa protege e areanan menciona den e mocion.
Ta papia aki di e siguiente areanan: Duinen di Westpunt; e parti di Saliña / Malmok; area di naturalesa banda di The Mill; area di naturalesa Bubaliplas; e parti naturalesa na Ser’i Teisji; e islotenan na Parkietenbos; otro islotenan na Barcadera; e area di naturalesa Mangel Halto y Isla di Oro; otro rifnan na Playa; Mangrovenan na Zeewijk; islotenan San Nicolas; saliña na Tierra del Sol; e strook di naturalesa Seroe Colorado; e mondi di Ser’i Teisji; Saliña Savaneta; Saliña Serca; Rooi Taki y Rooi Bringamosa; Rooi Manoonchi y Rooi Lamoenchi.

Esaki tabata un proposicion presenta dor di Prome Minister Mike Eman; Minister di Turismo, Transporte y Energia Mike de Meza y Minister di Desaroyo Teritorial, Medio AMbiente y Integracion Benny Sevinger.

Top