Conseho di Minister a aproba pa Minister drs. Paul Croes ta ausente un rato Y asina duna espacio pa husticia haci su trabao

Awe mainta, Minister drs. Paul Croes a presenta na Bestuurskantoor, unda despues di a reuni cu su personal di su oficina, a reuni cu coleganan Minister, pa despues sali y duna di conoce, cu e lo bay riba non-actief.

Minister drs. Paul Croes a haci despues un declaracion breve den presencia di Prome Minister mr. Mike Eman.

 

El a cuminsa na gradici Papa Dios p’e forza, p’e sosten cu den todo caso den e momentonan dificil aki, cu e ta pasando aden como famia y como persona, su amistad y coleganan Minister. Seguramente momentonan cu hamas y nunca a pensa cu e lo haya su mes aden den su carera politico, pero sigur e ta tuma e hecho aki masha na serio.

No ta su intencion pa no duna ningun declaracion riba e caso mes, pa motibo e kier haya claridad di tur acusacion di e caso aki.

 

E mes te n’e momento aki no tin mucho informacion concreto, tampoco su abogadonan no a haya nada concreto ainda.

Pero ta considera e accion di parti di Ministerio Publico como algo hopi serio, y sigur e kier duna e espacio necesario pa husticia haci su trabao den un forma obhetivo, den un forma deligente.

 

Banda di tur esaki, Minister Paul Croes a bisa cu e tin pleno confianza den nos sistema hudicial, cu ta uno di mas fuerte den Caribe y e ta kere cu dunando e espacio requeri na Ministerio Publico e ta kere cu lo bin cu e berdad na final.

 

Bisando tur esaki, Minister drs. Paul Croes a bisa cu mustrando seriedad di e caso aki, awe

mainta despues di consultanan cu consehero, cu famia, pero tambe cu coleganan Minister, el a trece un proposicion, cu a keda aproba pa Conseho di Minister p’asina e enfoke un biaha mas ta riba e caso cu ta andando.

Y sigur pa duna e espacio completo n’e autoridadnan pa nan por haci nan trabao, sin tin ningun influencia alguno.

 

E peticion haci ta pa un periodo di ausencia, pa motibo e caso awor no duna espacio p’e por sigui haci su trabao. Como tal tur loke e tin di haci, a traspasa tur trabao pa Minister mr. Angel Bermudez, pa un periodo cortico, te ora cu e investigacion finalisa, p’e bolbe pa prepara activo den e funcion aki.

Minister drs. Paul Croes a expresa un biaha un gradicimento na su famia, cu a haya nan mes conmovi den e caso aki, pero tambe na tur esnan cu ta comparti nan sentimento cune y su famia.

 

Henter e proceso aki sigur ta trece un mancha riba su Ministerio y riba pais Aruba, riba gobernacion tambe di nos pais, pesey e mihor opcion aworaki ta, p’e distancia su mes un rato for di e trabaonan diario y pa gobernacion por continua.

Y na final, drs. Paul Croes ta garantiza pueblo y e siguidornan cu e hunto cu hendenan lo sali for di e reto aki cu frenta na laira.

 

PROME MINISTER MIKE EMAN

Prome Minister Mike Eman, kende tabata den compania di Minister Paul Croes, ora cu el a haci e participacion aki, un biaha mas a reitera cu loke ta pasando sigur a conmovi nan tur profundamento. Pesey palabra di solaridad y sosten na famia di Paul Croes y na comunidad henter, no ta biba pa algo asina. Pesey palabra di solidaridad y amistad ta na su lugar.

 

Pa loke t’e peticion haci, sigur Conseho di Minister a acepta esaki, pa duna husticia tur e espacio cu mester pa haci su trabao.

Sigur cu tur esnan cu ta forma parti di Gobierno y di partido AVP, ta tuma e caso aki  masha na serio.

Conseho di Minister a acepta e proposicion pa Minister drs.Paul Croes ta ausente pa un tempo, cu ta un proposicion hopi etico, y Gobierno ta contento di e posicion cu Minister Paul Croes ta tuma, ta demostra e caminda corecto pa cana, segun Prome Minister Mike Eman.

 

 

 

Top