Construyendo Progreso: Minister di Asuntonan Social, drs. Paul Croes tin como prioridad atencion pa personanan cu limitacion

Desde comienso di Gabinete Mike Eman II, Minister Croes a pone riba su agenda un atencion special pa personanan cu limitacion. E maneho aki den 2017 ta continua y cu mas perseverancia pa cumpli cu e meta pa mas inclusion di personanan cu limitacion den nos comunidad.

 

E maneho social aki ta pone enfasis rib’e posibilidad pa crea mas oportunidad pa personanan cu tin cualkier tipo di limitation wordo mas inclui den nos comunidad y participa den diferente area di e sector di trabou riba nos isla. Esaki lo trece cu ne sin duda algun menos discriminacion di personanan cu limitacion y ta eleva calidad di bida di cada un.

Banda di esaki, nos comunidad lo tin e oportunidad di brinda un aprecio special na e personanan aki, mirando nan deseo y trabou duro pa un trato igual.

 

Pa haci esaki posibel Ministerio di Asuntonan Social ta conta cu diferente fundacion cu ta duna guia y cuido na personanan cu limitacion riba un base diario.

Minister Croes tin un aprecio special pa e trabou incansabel aki, y ta aplaudi un y tur cu ta aporta na meta aki. Minister Croes ta para fuerte rib’e punto di bista cu e personanan aki no mester wordo exclui, pero mas bien inclui y nan derechonan respeta, esey ta e enfasis cu lo tin un biaha mas den 2017.

 

E aña aki, Gobierno di Aruba y Ministerio di asuntonan social a conoce un aumento substancial den presupuesto p’asina por sigui subsidia e instancianan concerni y por continua cu e bunita trabou. Minister Croes ta desea di pronto mira e comunidad mas envolucra y asina hunto yuda logra e meta pa mas inclusion di personanan cu limitacion den nos comunidad.

Top