Construyendo Progreso Pa Minister Croes estudio di AIB ta reconfirma impacto positivo di refineria den tereno laboral, entre otronan

Na salida for di reunion di Conseho di Minister di diamars mainta caminda Aruba Investment Bank a presenta e resultadonan di nan Estudio di Impacto Economico di reapertura di refinera, Minister di Trabou drs. Paul Croes a remarca cu e documento ta un reconfirmacion di efectonan positivo importante cu ta bay conoce den e aspecto economico, financiero, laboral, comercial y social.

 

Minister Croes a enfatisa cu e estudio no simplemente a bay na mira e cantidad di percentahe cu desempleo lo baha na Aruba, pero adicionalmente a analisa e aspecto di consumo, e aspecto di prima y con cada trahador lo ta contribuyendo na diferente fondo, manera AZV y SVB, sin laga afo e impacto di consumo di e trahadornan.

 

Entre 1.200 pa 1.400 trahador directamente emplea den refineria, representando un disminucion di e indice di desempleo di 3%.

“Si tuma 2009 como punto di salida y inicio di gobernacion na 12% di desempleo, nos lo cera 2017 bou di e 5% di desempleo,” asina e titular di Trabou a indica.

“Na e momentonan aki ta hopi importante pa Gobierno, comunidad y pa CITGO e timeframe di e proyectonan, esata ki tempo ta inicia y na ki momento por sinti e impacto mas grandi.”

 

Banda di e impacto laboral, Minister Croes y coleganan di Gabinete Mike Eman a tende for di Aruba Investment Bank di e impacto financiero riba presupuesto di Gobierno, den economia en general, pero tambe pa e sector comercial rond di e refineria.

 

Minister Croes a conclui bisando: “Cada persona trahando na e refineria cu un entrada stabil ta nifica un persona cu tin pa duna su famia, cu tin pa bay un banco busca un credito y cu tin mas pa inverti den consumo. Esaki ta loke awe AIB a presenta na Conseho di Minister pa un biaha mas confirma e impacto importante cu esaki ta bay tin pa nos pais.”

Top