Copa Dia di Betico den Hisamento di Peso

Despues di a organisa e exitoso Campeonato Nacional caminda un grupo grandi di atleta di Aruba y Corsou a competi, awor Federacion di Pesas ta anticipa un bon participacion un bez mas, pero e biaha aki den e Copa Dia di Betico 2017.

Esaki lo bira e prome competencia oficial di Federacion di Pesas pa loke t’e calendario di actividad den 2017.

 

Diarazon 25 di januari lo tin e competencia y esaki lo cuminsa prome cu e pisamento pa 1or y pa 3or di atardi lo tin e competencia mes den Centro Deportivo Frans Figaroa na Noord, cual por cierto t’e cas di e deporte di hisamento di peso.

Ya caba varios atleta a prepara nan mes debidamente p’e prome competencia di aña, mientras den e diferente categorianan nos por anticipa bon bataya.

E biaha aki un bes mas e torneo lo conta cu participacion di e atletanan di Crossfit, cu for di nan existencia ta engrandese e deporte di hisamento di peso den gran forma.

 

Den luna di december, varios di nos atletanan di pesas a duna un tremendo presentacion na Corsou caminda e logra kibra varios record nacional. Mas cu claro e expectativanan ta halto un bes mas pa logra supera otro recordnan di Aruba.

Un danki sigur na Lotto, e Loteria di Aruba pa medio di Comision di Subsidio cu a subsidia e eventonan deportivo enconexion cu e celebracion riba Dia di Betico.

Top