Cristina Fernandez Kirchner lo wordo procesa pa asociacion ilicito y fraude

Despues cu e apelacion di e ex Presidente, Cristina Fernandez, a wordo rechasa, husticia di Argentina a confirma e proceso di e ex Presidenta pa asociacion ilicito y fraude, despues di a entrega, presuntamente, trabounan publico na balor di 2.200 miyon dollar na un empresario.

 

Corte Supremo na Argentina a ratifica e decision di e hues federal, Julio Ercolini, dictamina den segundo instancia na december di 2016 y aki a “abilita e via pa realizacion di e huicio oral y publico”, segun a splica e Centro di Informacion Hudicial (CIJ).

Ademas, e husticia argentino a comproba e embargo di mas o menos 565 miyon dollar riba propiedadnan di e ex mandatario, kende a haya un inmunidad parlamentario na momento cu el a keda elegi como senador den eleccionnan legislativo di dia 22 di october cu a pasa.

 

Husticia argentino ta investigando presunto iregularidad den e otorgamento di obranan publico na e Grupo Austral, presidi pa e empresario Lazaro Baez, den e provincia di Santa Cruz (Patagonia), durante e mandato di Kirchner (2007-2015).

Kirchner ta enfrenta otro investigacion, unda cu el a nenga siman pasa dilanti un hues di a encubri hendenan di Iran cu a wordo acusa na Argentina, pa e atentado contra e centro hudiu-argentino AMIA, cu a laga un saldo di 85 morto na 1994.

 

Leave a Reply

Top