Cu honda pena y sumamente conmovi partido MEP a tuma nota di e fayecimento di sr. Jose (Joe) Rasmijn (d.f.m.). Joe Rasmijn a nace dia 8 di augustus 1932 y a fayece hustamente rib’e dia cu su partido stima MEP a cumpli 46 aña, esta dia 9 di februari 2017. Na bida Joe tabata co-fundador di nos partido y a aparece riba nos lista na 1973, 1975, 1979 (2x), 1983 y 1985. Pues durante henter e trayectoria di e lucha pa Status Aparte Joe a milita riba nos lista y semper a duna su sosten incondicional na nos Libertador Betico Croes pa saca Aruba for di e constelacion Antiyano. Y despues cu gran lealtad el a sigui sostene nos lidernan sr. Nel Oduber y sra. Evelyn Wever-Croes Durante hopi aña Joe tabata miembro di Conseho Insular di Aruba representando partido MEP. Tambe Joe tabata exitoso cu su seafood restaurant pa local y turistanan, Brisas del Mar y cual restaurant tabatin su impacto sumamente positivo pa cu nos industria di turismo. Tabata na november ultimo cu partido MEP a duna Joe su debido reconocemento den un evento special pa (ex-) candidatonan relaciona cu e celebracion di 45 aña di MEP den Fort Zoutman. E alegria expresa riba cara di Joe Rasmijn ta demostra su gratitud pa cu e reconocemento aki. Lider di MEP, sra. Evelyn Wever-Croes den nomber di partido ta gradici sr. Rasmijn pa su fieldad y pa tur locual el a haci pa nos partido y nos pais y ta spera cu Papa Dios lo tin un bon luga den su Reino pa sr. Rasmijn. Na su señora, yiunan y demas familia, nos mas sincero condolencia. Alavez ta haci un suplica pa acudi na e acto di entiero di nos gran baluarte sr. Joe Rasmijn diamars awor. Paz na su restonan y cu Joe sosega den Reino di Señor.

 

WILLEMSTAD – Ayera den oranan di mainta Central di Polis a  haña notificacion di un accidente basta grave cu mester a tuma lugar na Gomez Enterprises.

Na momento cu Polis a yega n’e sitio a bin topa cu un vehiculo cu a drenta curá di Gomez kibrando e porta y tambe causa daño na dos truck den e curá.

Chofer di e vehiculo a sali herida y mester a pidi ambulance p’asina por a duna e victima prome asistencia.

Basta daño material a keda registra n’e vehiculo y no sa kico tabata causa di e accidente aki.

Forensys hunto cu Polis a keda encarga pa haci investigacion pa sa kico por tabata e causa cu e vehiculo a bin accidenta.

Ambulance a transporta e victima pa policlinica pa mas tratamento medico.

Top