Cu nan Plan 3 mil +, PPA/UPP lo kier – E balor, vooral awor, di politiconan cu experiencia den gobernacion y Parlamento

E Gobierno actual ta trata na tur forma di bagatalisa e debe nacional astronomico cu nan a hinca nos pais aden. No tin mas espacio pa sigui fia placa.

CAFT Aruba a laga sa cu Gobierno di Aruba a surpasa e limite di loke ta aceptabel pa financia PPP, ya cu e peso anual riba presupuesto a bira mas cu por soporta. E partido na mando sinembargo y tambe esnan den oposicion ta keda haci promesanan, apesar cu nan ta na altura cu no por lo cumpli cu nan.

 

Cu e situacion financiero di Gobierno, esta di Aruba, ta malo, nos por mire den e hecho cu pronto, manera CAFT a recomenda, lo bay sera su caha pa loke ta goederen en diensten. Pues 4 luna prome cu aña sera, por bisa cu tin un shut down financiero. E gastonan regular so kizas lo keda wordo paga, di acuerdo cu un comunicado di UPP.

 

Pues, nos tur mester ta di acuerdo cu e situacion financiero di Aruba ta den masha mal estado y cu e lo bay rekeri un gobernacion cu lo mester tin como prome obhetivo restablece ordo den e desaster administrativo y financiero.

Un gobernacion cu ta basa riba reglanan estricto di bon gobernacion y ta consisti di personanan serio y cu amplio experiencia riba tereno gubernamental y Parlamento y cu ta habri pa inovacion.

 

E panorama politico actual ta mustra cu muy porbablemente e siguiente Gobierno lo ta un Gobierno di coalicion. E pregunta ta surgi e ora cua partidonan lo ta yama pa asumi e responsabilidad di maneha nos pais den e momentonan turbulento cu nos ta biba aden aworaki. Un pais cu problemanan inmenso y creciente riba tereno social, husticia, enseñansa, salubridad y economia.

 

Obviamente cu un di e dos partidonan grandi lo bay participa cu probablemente uno of dos partido chikito. Un coalicion di e partido na mando AVP y POR lo nifica continuacion di gobernacion cu a hinca nos na prome lugar den e desaster aki, cu engaño, manipulacion, intimidacion y un maneho liberal na unda e pueblo a wordo sacrifica pa cumpli cu esnan cu a subsidia e campaña di e partido.

Sr. Otmar Oduber y sra. Marisol Lopez-Tromp ta complice y “willens en wetens” a contribui na hiba e pais den e decadencia actual. Sra. Lopez-Tromp t’e unico Minister di e Gobierno anterior cu a wordo cuestiona den e raport di WODC cu Mike Eman mes a laga traha pa trata na condena e Gobierno anterior.

Como recompensa Mike Eman a incorpora sra. Lopez-Tromp den su partido y a hasta haci’e Presidente di Parlamento.

 

Un posibel coalicion di partido MEP cu POR tambe lo ta factibel, pero e mesun obhecionan menciona anteriormente ta aplicabel aki. Con por confia den un Gobierno na unda Otmar Oduber y Marisol Lopez-Tromp y varios coordinador lo participa. Nan lo muy probablemente secuestra e Gobierno y haci y deshaci na nan antoho, manera semper nan a haci.

 

PPA/UPP tin respet p’e esfuerso y anhelo cu e partido RAIZ a bin ta presenta. Nan ta hobennan profesional cu un afan pa drecha e situacion di nos pais, pero nan falta experiencia y esey lo ta un factor importante aworaki pa saca e pais for di su situacion actual. Nan lo mester t’e fuel pa enforza e inovacionnan den nos sistema politico.

E partidonan RED, ABO, MAS y CURPA tambe tin personanan profesional afilia na nan partido.

E unico cu experiencia den Parlamento ta sr. Rudy Lampe di RED. Partido UPP lo desea di wak e partidonan chikito tambe haya representacion den Parlamento y asina caba cu e asina yama “stempelparlement” cu ta burla di nos democracia y cu e ultimo añanan a ignora tur conseho di e organonan consultativo.

 

PPA/UPP ta un alternativa real p’e siguiente gobernacion. Cu no solamente dirgentenan cu tin amplio experiencia riba tereno gubernamental y Parlamento, pero tambe hobennan profesional cu lo sa di trece ideanan inovativo pa pone nos pais riba e “right track” bek. Hendenan cu a demostra cu tin solamente e interes di e pueblo na pecho y cu ta prepara pa asumi e responsabilidad di participa den e siguiente gobernacion. PPA/UPP tin tur loke mester pa yuda drecha e situacion financiero/economico cu plannan realistico (Plan 3MIL+) a base di un programa social-democrata, sin populismo, sin manipulacion y sin fiestamento.

Gobernacion ta algo serio.

 

Den transcurso di diarazon merdia e combinacion PPA/UPP a alcansa e firmanan necesario p’asina por participa na Eleccion 2017. Di parti di UPP nos kier a gradici tur esnan cu a duna nan sosten por medio di nan firma. Cu esaki tambe nos ta drenta den e di dos faceta di un cambio real aki na Aruba. Nos kier a gradici tur esnan cu sea via mail, telefon, app of personalmente a mustra nan apoyo y deseonan di exito na nos causa.

PPA/UPP tin e ingredientenan necesario pa t’e Alternativa Real den un coalicion, esta: Seriedad, Experencia y Inovacion. E Plan 3MIL+ lo hiba Aruba na e siguiente nivel cu lo percura pa un Miho Mañan.

 

UPP ta cla pa e reto aki. Y esun cu ta sinti su mes yama pa sostene e reto aki, por tuma contacto cu nos partido na upp.unista@gmail.com.

 

 

Top