Cu sosten di fondonan di Aruba Hospitality & Security Foundation Polis ta reenforsa nan visibilidad riba caya cu dos auto nobo

Diabierna mainta durante un ceremonia hopi ameno yena cu positivismo na Garage Cordia, un delegacion di Cuerpo Policial Aruba (KPA) dirigi pa Alto Comisario Interino, Vanessa Tjon, hunto cu Minister di Husticia, mr. Drs. Arthur Dowers y CEO di AHATA y Presidente di Aruba Hospitality & Security Foundation (AHSF), Jim Hepple, a haci entrega di dos Toyota RAV 4-hybrid pa reenforsa e visibilidad di Polis den e area di Noord y Palm Beach.

 

Un Alto Comisario Interino hopi entusiasma a splica cu “Nos tin basta tempo ta cooperando cu AHSF y durante e transcurso di e añanan nan a yuda Cuerpo Policial cu diferente material pa asina por eherce e trabao cu mas efectividad.

Cu e dos autonan aki nos por tin miho visibilidad riba caya, principalmente den e area di Noord y e area turistico. Noord ta un di e districtonan cu a bira hopi grandi den e ultimo añanan.

Nos ta priminti cu di parti Polis lo nos haci bon uzo di nan, principalmente den prevencion”, asina Alto Comisario Interino, Vanessa Tjon a bisa.

 

Minister Arthur Dowers a splica cu mirando e cambio den e forma di traha bieu cu AHSF unda tabata paga pa guardia di siguridad, awor a bay na paga pa material pa Cuerpo Policial, e dos autonan aki sigur lo yuda combati criminalidad.

“Esaki ta e dos prome nan, pronto tres mas ta na caminda pa asina Polisnan por haci un trabao mas efectivo riba caya. Mas aleu, mi ta hopi orguyoso di e trabao cu nos Polisnan ta haciendo na e momento aki,” e mandatario a agrega.

 

Jim Hepple a expresa su satisfaccion di por mira cu e cooperacion di e fundacion cu Polis ta percurando pa resultadonan positivo y a priminti cu lo sigui traha cu Cuerpo Policial pa crea mas tanto siguridad den e area turistico.

A funda Aruba Hospitality & Security Foundation (AHSF) cu e meta pa crea mas siguridad den e area turistico y desde su comienso ta cooperando cu Cuerpo Policial pa logra esaki.

 

Gerente di Garage Cordia a entrega e autonan nobo na AHSF, cu a pasa e yabinan pa Minister di Husticia, pa Alto Comisario interino di Cuerpo Policial, pa e Alto Inspector encarga cu patruyahe, pa e Inspector encarga cu e districto di Noord y despues pa e Polisnan cu diariamente lo patruya den e autonan nobo aki na Strand Politie.

Top