Cu un colorido y bunita apertura dedica na dos baluarte Bertha Wolf Croes y Eugenio “Tan” Helder

Campeonato HEINEKEN di Aruba Softball Bond a inicia diabierna ultimo riba veld di Flatstone. Un veld carga cu fanaticada y atletanan tabata testigo di e bunita y colorido apertura.

Pa 7:15pm MC a yama dilanti tur representantenan y a saluda tur presente.

E dos baluartenan na kendenan a dedica e campeonato tanto sra. Bertha Wolf Croes y Famia y tambe Eugenio “Tan” Helder y famia a wordo yama dilanti pa tuma nan asiento riba tereno.

 

Lamentablemente, Minister di Deporte of representante no a duna acto di presencia y pa di 8 aña consecutivo ta briya cu nan ausencia na apertura di campeonato oficial di Aruba Softball Bond. Tampoco Parlamentario sr. Norman Roos presidente di COA a honra ASB cu su presencia.

ASB manera un bon tata lo keda manda invitacion tur aña. Mesora a continua cu desfile di tur e equiponan unda después a bay over pidiendo atención pa e himno di Aruba.

 

Presidente di ASB sr. Endy Croes a wordo yama dilanti pa hiba su discurso. Endy a gradici e baluartenan pa nan tempo dedica na deporte y splica rib’e desaroyo internacional y clasificatorionan importante na caminda. Endy a continua bisando cu deporte ta forma un comunidad, ta forma carácter y crea disciplina y ta siña nos gana y perde, pero mas aun tau ni un nación. Endy a haci un suplica na tur atleta pa hunga bala duro contra otro den tereno, pero saliendo pafo di tereno después di wega brasa otro y corda cu Aruba ta chikito y nos tur mester ta amigo di otro. Despues a bay over na homenagia nos baluartenan.

 

A continua pa lesa e CREDO di Softball unda dos hoben uno masculino y uno femenino a haci esaki. Pa prome biaha den historia ASB a introduci HURAMAMENTACION di umpires y scorers públicamente cual sigur ta un acto masha bunita y conoci na otro paisnan rond mundo. Durante eleccion pa escoge madrina di aña kende lo representa ASB durante henter aña 2017 Srta. Aishenu Aikelane Sprok a conkista e titulo y ta bira madrina oficial di ASB pa aña 2017. Despues a bay over na lansa e prome bala unda baluarte sra. Bertha Wolf Croes a subi montículo después di hopi aña y baluarte Sr.Eugenio “Tan” Helder a fungi como bateador hunto cu Gil Wester como cátcher y Zuleyka Willems como umpire y asina a lansa e prome bala p’asina oficialmente decreta inicio di campeonato 2017.

 

Na final a tira lo unda Spuiters vs Pizza Hut Monsters den categoría AA masculino lo bira e prome clash di campeonato. Pabien Aruba Softball Bond, Pabien Atletanan, Pabien Aruba.

Éxito na tur ekiponan.

Top