Cu yudanza di pueblo, specialmente esnan di Noord, Polis a logra pone man riba dos ladron

Den oranan di ayera media, Central di Polis a haya informacion cu lo tin un atraco na Bakval, unda dos persona a drenta un cas, y a bay cu masha mercancia.

Polis a mobilisa mesora y bin haya informacion cu e anti-socialnan aki tin un auto Honda preto, glas getint atras y glas blanco dilanti, cu stuurwiel na man drechi (RHD).

Varios unidad policial a mobilisa p’e area di Noord y asina a bin a topa cu e auto riba e caminda, y a cuminsa un persecusion.

E anti-socialnan aki no kier a respet señal di Polis pa para y dicidi di wak con nan por laga Polis atras, haciendo intento di dispista e Polisnan.

 

Dem Alto Vista, dado momento Polis a perde auto for di bista. Pero un habitante atento a notifica Polis cu el a mira un auto para riba un distancia y e hendenan a baha core bay den otro direccion. Polis a dicidi di rondona e area en busca di e ladronnan kendenan a logra sali cu maletanan yen di cos y a bati alarma. Despues di a rondona e area, a cuminsa cu un buskeda masal rond den area di Sabana Liber y Alto Vista.

 

E buskeda a dura basta largo, casi un ora, pero el a duna fruto. Habitantenan tambe a cuminsa notifica autoridad loke tabata hendenan straño den nan becindario. Mester admiti cu via un noticiero den oranan di merdia, habitantenan a dicidi colabora pa duna informacion, cu sigur a contribui na soluciona e caso aki un rato despues.

E resultado awe ta cu tin dos ladron sospechoso deteni. Pero falta uno mas, cu te ora cu nos a relata e noticia aki, autoridad no a pone man riba dje ainda.

 

Diferente team, K-9, Polis Uniforma, Recherche di Noord y Polis di diferente departamento, Flexiteam, a uni pa pone un stop n’e ladronnan aki, cu di acuerdo cu nos informacion ta Arubiano tur ta.

Mester admiti, ora di situacionnan asina, si tur hende duna un man, sigur nos tur por pone un stop n’e criminalnan aki.

Leave a Reply

Top