Cuater empleado di Marriott’s Aruba reconoci den programa “Way to Go!”

Internacionalmente e reconocemento pa empleadonan mas prestigioso den e compania Marriott Vacation Club International (MVW) ta e “Way To Go!”, Awards. E aña aki cuater empleado di Marriott’s Aruba Surf Club y Marriott’s Aruba Ocean Club a haya mas di 200 “Way To Go!”, esta e comentarionan positivo for di nan miembro y huespednan, y nan lo biaha proximamente pa Orlando, na Merca, unda cu e headquarters di MVW ta estableci pa un ceremonia di reconocemento special.

 

Na Orlando lo tin presente e “elite” entre empleadonan pa loke ta trata “Way To Go”; for di un poco mas di 100 mil empleado mundialmente, menos di 2% di e total di empleadonan ta haya mas di 200 “Way To Go!”, pa aña. Un empleado por ricibi un “Way To Go!”, na Aruba mes for di e miembro of huesped, pero tambe tin bishitante cu ta scoge pa manda e comentario positivo cu nomber di e empleado pa e oficina principal di MVW.

 

Localmente tambe Aruba Marriott tin un programa di incentivo basa riba e programa internacional y durante di henter aña ta honra empleadonan cu ta destaca cu diferente regalo y gestonan di aprecio.

Pa Aruba lo tin presente na Orlando, e empleadonan Sandra Adams y Claudette Rose-Groeneveldt di Marriott’s Aruba Surf Club y Linda Henriquez y Vicky Benavides di Marriott’s Aruba Ocean Club.

 

Director of Rooms Operations di Ocean Club, Lilian Britten, a expresa cu nan ta hopi orguyoso y contento di e logro di nan empleadonan, pa cual nan lo representa Aruba na e ceremonia. Definitivamente pa e team di Ocean Club e ta un logro y honor grandi, el a agrega.

Marriott ta tuma studiantenan part-time, nan ta siña nan, traha cu nan pa nan yega na un nivel profesional di trabao, no solamente pa nan logra e “standards” di Marriott, pero nan ta destaca den e area aki tambe. “Masha pabien na Vicky y Linda, nos ta orguyoso di boso, boso ta digno representante di nos resort”, Lillian Britten a expresa.

 

Vicky Benavides ta un part-time front desk agent, kende ta bay haci 5 aña trahando cu Marriott. E ta splica cu e ta stima su trabao hopi, e ta stima su huespednan y no ta considera loke e ta haci “djis trabao”, pero e cultura di Marriott a bira parti di dj’e. Benavides ta añadi cu como cu el a cuminsa asina jong cu Marriott, e no sa otro cu e cultura di Marriott pa loke ta trabao y el a ripara cu e ta hiba e cultura ey tambe pafo di su trabao.

 

Bill Marriott ta bisa cu mester trata e empleadonan bon pa nan trata e guestnan bon y esaki, Vicky ta bisa, ta loke e ta gusta masha di e compania. E ta corda e nomber di su huespednan, e ta yuda cu kico cu nan mester y ta bay “the extra mile” pa nan como cu e ta stima su trabao; e ta sinti cu e huesped ta aprecia su esfuersonan hopi y cu ta esey ta pone cu nan ta menciona su nomber.

 

Linda Henriquez ta un cara hopi conoci pa su huespednan. Cu su “headpiece” special, den diferente tema; su colornan di eyeshadow cu ta capta atencion; e ta pone cu huespednan ta busk’e pa mira ta kico di nobo el a bin cu ne atrobe. E ta traha den e departamento di Recreation, na Ocean y na Surf Club, unda cu e atende e “towel hut”. E tin 7 aña trahando cu Marriott.

E ta encanta su trabao, e ta bisa cu e ta gradici y super contento di forma parti di e team di Marriott Vacation Club, pa e compania su oportunidadnan pa siña, pa crece y pa e beneficionan cu ta considera “super bon”. E cantidad di “Way To Go!”, cu un persona ta ricibi ta cuminsa caba cu un smile, cu e charisma, cu e “spirit to serve” pa cu e huespednan.

 

E huesped ta bin y Henriquez ta menciona nan na nomber, e ta reconoce nan y e ta bisa nan semper pa nan no por lubida su nomber, pasobra Linda kiermen “bunita” na Spaño.

E ta hari cu su huesped y ta haci joke. Y e tin huesped cu tur dia ta pasa pa salud’e pa mira su headpiecenan special, cual e ta adapta pa ocacionnan special, sea ta Dia di Himno y Bandera, 4th of July, celebracion di Dia di Colombia, di Venezuela, of Saint Patrick’s Day, pa menciona algun.

Su huespednan ta cana di un hotel pa e otro pa busk’e pa mira su headpiece di dia.

 

“Nos ta hopi orguyoso di tin Sandra y Claudette ta bayendo pa ricibi un reconocemento na Orlando, nos ta desea nan un trip fabuloso, un recuerdo bunita cu nan lo tin pa henter nan bida”, esaki tabata palabranan di Jasmin Maduro, director di Rooms Operation di Aruba Surf Club na vispera di e biahe di su coleganan. “Way To Go!”, ta honra e empleadonan cu a destaca den nan comunicacion y interaccion cu e huesped; e ta un reconocemento cu ta bin en realidad for di doñonan y huespednan y banda di un programa local e programa internacional ta honra e top empleadonan, Jasmin Maduro ta splica. E ta un honor masha special pa Surf Club manda dos empleado y e team di e hotel ta hopi orguyoso di Sandra y Claudette.

 

Claudette Rose-Groeneveldt a cuminsa traha na Marriott casi 13 aña pasa y ta forma parti di e team di Recreation.

“Ta un departamento maraviyoso pa traha; Marriott ta e miho hotel riba e isla; e ta “Wow!” y tur huesped ta bin aki pa un experiencia “Wow!”, Rose-Groeneveldt ta remarca.

Loke ta haci Claudette Rose-Groeneveldt un persona stima pa su huespednan ta cu e ta reconoce nan, e ta cuminda nan na nomber y asina nan ta sinti balora. E ta splica cu su huespednan ta trece na yiu y nietonan pa cera conoci cu ne; nan ta busk’e pa cuminda, pero tambe pa mira ta ki style di cabey e tin e dia ey. E ta cambia su cabey tur siman, esaki ta parti di su personalidad; e ta agrega cu semper e tin un smile bunita pa su guestnan, e ta jolly y “outgoing” y semper ta cuminda nan cu gusto.

 

Un otro empleado di Aruba cu ta ricibi masha hopi “Way To Go!”, ta Sandra Adams. E tin 7 aña ta traha na e Fitness Center & Club. E ta stima su trabao, e ta smile hopi, y ta gusta papia cu su huespednan, esaki ta refleha den su trabao y su forma di anda cu tur hende.

Sandra Adams ta splica cu loke e ta haci, cual ta interactua cu su huespednan, ta haci cu semper nan ta bolbe. E ta papia cu nan, e ta corda felicita nan cu nan hacimento di aña y aniversario di casamento; y si nan ta celebrando un ocasion special. E “repeat guest” cu ta bolbe tur aña, of cu frecuencia semper e ta reconoce. Asina semper huespednan ora nan bolbe ta pasa busca Sandra den e gym pa cumind’e; y ta mencion’e den nan “Way To Go!”, cu bunita compliment.

 

No ta prome bes cu empleadonan di Aruba ta ricibi e distincion aki. Benedict Pineda a gana e premio aki na aña 2013 y Wilma Benjamin a gana e premio na aña 2014. Nan tambe a biaha e tempo ey pa Orlando, Florida pa ricibi nan distincion. Na aña 2015 tabata Lillian Britten y Mike Rodriguez di Marriott’s Aruba Ocean Club.

 

Pa por gana e premio special aki, e empleado di Marriott mester haya riba 200 comentario di recomendacion di huespednan. No ta diferencia den cua departamento bo ta traha den e hotel, con tal cu e huesped laga un bon comentario y recomendacion pa e empleado.

 

Na e compleho di hotel y timeshare resorts, Marriott di Aruba, ta haci hopi esfuerso pa por brinda mas y miho servicio na nan huespednan. Den esey ta percura pa empleadonan sigui trainingnan intensivo a base regular, como parti di nan programa pa garantisa un servicio di calidad superior. E hecho cu Aruba tin dos representante den e premionan di “Way To Go!”, ta un bon ehempel di resultado positivo di e inversion haci den train empleadonan den duna bon servicio.

Top