Cuerpo di Bombero Aruba cu un vision pa futuro Bomberonan di Aruba di biahe pa expande nan profecionalismo Preparando 3 oficier nobo pa Cuerpo di Bombero

Despues cu un team di Cuerpo di Bombero Aruba a sali rumbo pa Texas, Merca den weekend pa sondea e posibilidad di entrenamentonan na Texas A&M, diadomingo un di dos team a sali rumbo pa Corsou pa studia pa Vak-Officier.

Un ekipo di Bomberonan mester ta bon prepara pa por actua mesora den caso di un tragedia y e entrenamentonan aki mester ta riba nivel internacional mirando cu Cuerpo di Bombero ta maneha e control di situacionnan cu lo por surgi na nos Aeropuerto Internacional.

 

Segun e comandante esaki t’e rekisitonan cu Cuerpo di Bombero di Aruba mester pone pa su mes y asina ofrece e mihor servicio posibel den situacionnan cu lo por surgi.

Mirando e importancia di actualisa e conocemento di nos Bomberonan, Ministerio di Husticia, bao di cual Cuerpo di Bombero ta resorta, a duna su apoyo completo y cu e sosten aki e team a sali rumbo pa Merca pa haci un estudio pa mira unda lo ta mihor pa manda Bomberonan pa sigui cu trainingnan pa certificacion pa logra e meta di sigi ta un ekipo di Bombero riba nivel internacional.

 

Haciendo esaki Brandweer ta hisa e nivel di trabao aun mas p’asina sigi cumpli cu exigencianan internacional cu ta rekeri pa por keda mantene un Aeropuerto Internacional renombra.

Despues cu e prome team a subi avion diasabra rumbo pa Merca, un di dos team a sali rumbo pa Corsou riba diadomingo pa sigui un estudio pa Vak-Officier.

Ta trata aki di Pedro Werleman, Gregorio de Andrade y Dennis Edwardo, kendenan lo atende e estudio na Corsou p’asina por bira Officier den e brigada di Brandweer.

Nan lo mester bay 6 biaha pa completa e estudio completo.

 

 

Top