Cuerpo di Bombero CN tin 9 lider nobo di tèst di pruebanan físico

KRALENDIJK – Ta importante pa colaboradornan di bombero ta den condicion y apto médico pa haci nan trabou. P’e motibo akí bomberonan, hòmber y muher, periódicamente ta pasa un tèst nobo dirigí riba nan funcion.

Pa realisá esaki siman pasá a prepará 9 colaborador di Cuerpo di Brandweer CN pa ta lider di tèst di e asina yamá ‘Periodiek Preventief Medisch Onderzoek’ (PPMO).

E tèst akí ta tuma lugar anualmente na BKCN. Tur 9 colaborador, 1 di Saba, 3 di Statia y 5 di Bonaire a slaag y awor nan ta lidernan di tèst di PPMO diplomá.

Coordinador/docente nacional Ellen Buskens di Hulanda a prepará nan y tambe a examiná nan. Awor e otro coleganan por pasa PPMO serca e lidernan di tèst nobo.

 

Trabou di un lider di tèst

E trabou di un lider di tèst ta consistí di evaluá obhetivamente si e participantenan ta cumpli cu e exigencianan físico di e tèstnan nobo di brandweer. E èxamen ta consistí di dos parti, esta cuestionarionan y un saminacion médico di parti di un dòkter di keùr y un parti físico.

Un lider di tèst ta tuma e tèst físico. Evaluacion di e chekeo completo ta ser hací dor di un dòkter di keùr.

 

Tèst anual

Personal di BKCN mester pasa tur aña e parti físico di e tèst nobo akí di brandweer. Aki mester cubri un trayecto cu ekipo di trabou completo y aire comprimí, caminda ta haci tur sorto di actonan físico cu brandweer por topa cuné tambe durante di un despliegue real.

Despues ta subi cu ekipo di trabou completo y un vèst di chumbu èxtra (ekipahe completo 45 kg) den dos minuut un trapi di 100 tret.

E tèst físico akí ta puramente pa proba cu e colaboradornan ta suficiente den condicion pa por haci nan trabou bon.

 

Pa cada bombero, hòmber y muher, e mesun exigencianan ta na vigor, pasobra tur hende mester por haci mes trabou durante di un despliegue real. Esaki ta importante pa seguridad di coleganan, pero tambe p’e ciudadanonan di Bonaire, Saba y Statia.

 

Condicion riba nivel

Colaboradornan mes ta responsabel pa mantené nan condicion riba nivel. Esaki ta posibel den e ‘gym’ di Kazèrne di Brandweer.

Na Islariba nan por haci uso di e gymnan na Saba y Statia. Pa por haña y mantené e bomberonan den condicion ta haci uzo aya di instructornan di deporte y periódicamente di un ‘lifestyle coach’.

 

Docente Ellen Buskens tabata hopi encantá cu e cursistanan. El a experenciá esaki como particularmente agradabel y único.

“Nunca ainda mi tabatin un grupo asina motivá y bon prepará”, segun Buskens. El a keda grato sorprendé cu tur cos a cana asina bon.

BKCN ta keda invertí den su personal, pasobra BKCN ta keda carga seguridat na laira.

 

Leave a Reply

Top