Cuminsando cu triduo pascual riba Diahuebs Santo

Hesus a celebra su ultima cena cu su discipulonan y a regala nos loke ta mas valioso: e eucaristia. Na e sacerdocio el a duna e poder pa pordona y el a duna nos e mandato di amor.

Eucaristia of Santa Comunion, ta corda nos e lamchi sacrifica pa nos picanan, Hesus su morto y resurreccion y presencia di Señor den e ofrenda mes.

 

Den buki di Exodo nos por lesa con Dios a pidi Israel pa sacrifica un lamchi, con e lamchi ey tabata imagen di Lamchi di Dios. Den evangelio di Hesu-Cristo segun San Huan, Huan Bautista a mira Hesus ta bini cerca dj’e. El a bisa: “Ata e Lamchi di Dios, cu ta kita pica di mundo!

Hesus a bisa: “Ami ta e pan bibo cu a baha for di shelo. Si un hende come e pan, e ta biba pa semper. E pan cu Ami lo duna ta mi mes carni, cu Mi ta duna pa mundo haya bida!”

“T’Ami ta e pan cu ta duna bida! Esun cu bini cerca Mi, lo no haya hamber nunca mas; esun cu kere den Mi, por conta cu nunca mas e no ta haya sed.”

 

Den prome carta di San Pablo na cristiannan di Corinte nos por lesa: Esta cu riba e anochi cu nan a traiciona Señor Hesus, El a cohe e pan, yama Dios danki, kibr’e y bisa: “Esaki ta mi curpa; e ta pa boso. Haci esaki pa boso corda riba Mi.”

Hesus a haci su morto na cruz presente ya for di un dia prome cu El a muri mes, bao di figuranan di pan y biña. Pan traha di hariña di trigo. Durante e celebracion eucaristico nos ta resa na e Lamchi di Dios. Nos ta alaba y gradici Dios cu pa medio di Hesus El a libra nos di poder di pica y morto. Manera Elias nos tambe tin cu lanta, come y bebe e cuminda pa duna nos forsa pa yega cerca Dios.

 

Buki Exodo ta menciona con Hebreunan tin cu come e lamchi di Pasco pa nan scapa maldicion di Egipsionan. E pan consagra ta e Lamchi Pasco.

“E Lamchi cu a keda matá, ta digno di ricibi e poder, rikesa, sabiduria y forsa, honor, gloria y alabansa.” Hesus ta nos Lamchi berdadero di Pasco. “Ta un cos so mi a pidi Señor: esaki so ta mi deseo, pa mi por biba den cas di Señor tur dia di mi bida.”

“Feliz ta esnan cu ta laba nan paña y asina haya derecho di come for di e palo cu ta duna bida y drenta ciudad via e portanan.”

Esakinan ta esnan cu a pasa den e opresion grandi. Nan a laba nan paña y haci nan blanco purificando nan cu sanger di e Lamchi.”

“…un multitud grandi; ningun hende no por a conta nan.  Nan tabata di tur rasa, tribu, pueblo y idioma y a pone nan para dilanti di trono y dilanti di Lamchi, bistí na paña blanco y cu rama di palma den nan man.”

 

Laga nos celebra Pasco di Resureccion. Den e tempo aya Señor a bisa Moises y Aaron aya na Egipto: Ta fiesta di Pesag, na honor di Señor. E dia aki boso mester keda corda y boso mester celebr’e como un fiesta grandi na mi honor. Sigui celebr’e di generacion pa generacion; ta un decreto pa semper.”

 

Simbolo di lamchi

Nos kier promove e uso di lamchi como simbolo di Pasco di Resureccion en bes di e coneu. Parokia La Birgen di Fatima na Dakota ya pa algun aña caba a introduci e custumber di “bendicionamento di lamchi” pa e fiesta di Pasco di Resureccion.

E motibo ta pa nos muchanan, nos mes, nos famianan y bisiñanan por siña celebra na un miho manera e fiesta di Resureccion di nos Señor Hesus, cu ta nos Salbador y cu ta E Lamchi bendiciona.

Diahuebs, 13 di april, despues di Misa di Ultimo Cena tin e oportunidad pa cumpra bolo den forma di lamchi na balor di 10 florin.

 

BENDICIONAMENTO DI LAMCHI

Bendicionamento di bolo den forma di lamchi ta tuma luga durante oracion di Liturgia di Ora, esta Lauden, riba Diasabra di Aleluya, 15 di april 8’or mainta. Despues ta hiba lamchi bendiciona cas y ta lag’e gorda su curpa pa su mañan.

Por reserva esun di bo cerca Sharona Sapuana na tel. 5933071, cerca señora Liliane Wouters na tel. 560 4244, señora Samantha Croes na tel. 593 5234 of señor Michael Croes na tel. 593 9283.

Top