Curso ‘Declarant Douane’ organisa pa Aduana y ATIA a inicia

 

Diahuebs anochi a inicia e curso “Declarant Douane” organisa pa Departamento di Aduana Aruba cu colaboracion di ATIA.

Directora di ATIA, sra. Michelle de Groot a habri e anochi extendiendo un bon-bini n’e cursistanan.

Michelle de Groot a expresa di ta hopi contento di por mira e curso inicia despues di hopi luna di organisacion.

E interes pa inscribi tabata sumamente grandi y den tempo hopi corto a yena e 25 lugarnan cu ta tin disponible.

Ademas ya caba tin un lista di espera di 25 persona mas cu lo haci e curso durante e di dos tanda cu lo inicia na augustus.

 

Minister Angel Bermudez como invitado especial tambe a dirgi algun palabra n’e 25 cursistanan di e prome tanda.

Den su discurso Minister Bermudez a enfatisa e importancia di e curso cu lo facilita e proceduranan di declaracion di mercancia na Douane y lo resulta den mihor servicio n’e clientenan di e brokers participante.

Minister a finalisa dunando e cursistanan un palabra di pabien pa a tuma e iniciativa di participa den e prome tanda di e curso.

 

Señor Lito Pablo como Director suplente y cabesante di e curso a sera e parti oficial di e anochi splicando cu e obhetivo ta pa na final di e curso e cursistanan por interpreta e leynan di mesun manera cu e Douaneronan y asina kita tur duda cu por tin pa acelera e proceduranan y evita multanan cu ta wordo duna na momento cu no ta adhere n’e leynan of ta interpreta e leynan di manera diferente.

Ademas lo train e cursistanan riba e sistema di Asycuda cu a wordo introduci algun aña pasa pero pa cual nunca a ofrece un training oficial.

 

E curso lo sigi te final di juni y lo finalisa cu un examen oficial pa cual e cursistanan cu pasa e examen exitosamente lo haya nan certificado.

E fecha p’e di dos tanda di e curso lo wordo anuncia despues. Pa mas informacion por tuma contacto cu ATIA via info@atiaruba.org.

 

 

 

 

Leave a Reply

Top