Dama haya morto cu herida di bala den cabes

KRALENDIJK – Algo prome cu 1’or di marduga, un caso lamentabel a tuma lugar den Caya Irma na Antriol.

Den un apartamento, Polis a topa un dama sin bida den un plas di sanger cu herida di bala na su cabes. Mesora a cuminsa cu un investigacion y a topa auto di un persona cu lo mester tabata den compania di e dama na momento cu e acto aki a sosode. E homber lo mester a sali core bay.
Den prome instante a kere cu lo por ta un caso di suicidio. Pero no por a topa cu e arma di candela envolvi niun caminda.

Mesora a bay over na detencion di e sospechoso di inicial L.C., ya cu Polis ta sospecha cu mester sa mas di loke a sosode cu e dama.
A tene un entrada hudicial tambe na cas di e casa di e dama na Amboina. Pero e dama no ta biba eynan pa basta tempo caba.

Ta investigando ki relacion e dama tabatin cu e sospechoso deteni.
Investigacion ta den ful swing y e Team di Recherche no ta descarta nada den e caso aki.

 

E dama cu a perde su bida a keda identifica y ta trata di Carmen Campos di 45 aña di edad.

Paz na su restonan y forsa na e famia di e defunto. (foto cortesia Live 99MF)

 

 

Top