Damita ta distrai chauffeur pa asina supuesto primo pasa man pa dos mil dollar

Diadomingo algo pasa di 6’or y mey di mainta, polis ta wordo manda na altura di ex veld di Siboné na Seroe Patrishi pa un caso di ladronicia.

Na yegada polis a bin topa cu e victima di ladronicia para na su auto y aki el a splica polis cu el a caba di sali for di un conocido club nocturno na Palm Beach y pafor el a topa dos damita cu a pidi’e lift pa Seroe Patrishi.

 

E chauffeur a dicidi di duna e dos damitanan lift y mesora e damitanan a bisa e chauffeur cu nan supuesto dos primonan tambe mester di un lift, e chauffeur sin pensa dos bes a duna nan lift.

Riba caminda e chauffeur a habri e dashboard pa coi algo y aparentemente e ocupantenan lo a mira cu e tabatin un gran cantidad di placa den e dashboard.

 

Na altura di e veld di Siboné, un di e damitanan a cuminsa distrai e chauffeur y aparentemente dor di e bentana un di e supuesto primonan lo a pasa man p’e suma di  placa y a core bay.

Segun e chauffeur ta trata di dos mil dollar.

 

E dos damitanan tambe a purba huy pero e chauffeur a wantanan te ora polis a yega n’e sitio. Polis a papia cu e dos damitanan y nan a bisa polis cu nan no tin nada di hasi cu loke e dos supuesto primonan a haci.

Polis a conseha e chauffeur pa bay entrega keho na recherche, ya cu ta trata di su palabra contra di e otronan.

 

Top