Dangui Oduber (MEP): AZV y Gobierno ta maltratando y abusando di aseguradonan!

“Pueblo di Aruba ta pagando tur luna prima di AZV. Banda di esaki tur ciudadano cu ta biba rib’e pais aki ta paga BAZV. AZV ta un aseguro general medico pa tur esnan cu ta biba na Aruba pero lamentablemente ora e aseguradonan haci peticion pa cuido medico nan no ta haya esaki.

AZV manera cu e ta na e momentonan aki no ta funcionando. E calidad di remedinan a bira inferior, tur ta remedi ta generico, a corta den e pakete di servicio y e cuido no ta manera cu e mester ta”, segun Dangui Oduber.

 

“Na e momentonan aki tin 3 caso caminda aseguradonan ta pidi ayudo di AZV pa cubri nan gastonan y tratamentonan medico den exterior. Ta trata di Baby Lunah cu for di hopi tempo su mayornan ta hibando un lucha pa AZV cubri e gastonan medico y finalmente Minister Schwengle y AZV a nenga e baby aki derecho di biba.

Un acto sigur condenabel y un acto inhumano. Tur ser humano tin derecho di biba.

E argumento cu ta un experimento medico no ta valido. Bida di un ser humano no ta un experimento y ta 1 bida cada ser humano tin y mester haci tur locual mester haci pa mantene esaki”, Dangui Oduber a splica.

 

“Banda di esaki tin e otro caso di e señora cu accidenta y metser tratamento den exterior pa su cabes y a pidi ayudo di AZV y tambe ta wordo ignora y nenga.

Finalmente tin e caso di sra. Natalie Lin cu tambe mester busca su salud den exterior y tambe a haci un peticion na AZV pa cubri e gastonan. Sra. Lin tambe a wordo nenga cu e mesun argumento di Baby Lunah cu AZV no ta cubri tratamento medico cu ta experimento. Tur e personan aki ta paga AZV, tur ta contribui na e fondo y tur ta asegurado di AZV y tur merece di haya e cuido cu nan mester di AZV.

Ta algo inhumano di parti AZV y Minister dr. of ta kico e ta yama su mes awendia Schwengle pa maltrata aseguradonan di estado aki. Acaso e ser humanonan aki NO tin e derecho universal di bida? Acaso bida no ta importante pa e hendenan aki? Acaso ta prefera wak e gastonan medico cu bida di e ser humano?”, e Parlamentario ta cuestiona.

 

“Mike Eman ta mesun responsabel cu su colega Schwengle pa loke ta pasando cu e aseguradonan di AZV. No pro ta asina cu cada vez ta sconde tras di e pretexto experimento medico pa nenga aseguradonan nan cuido medico.

Kico ta mas importante pa Mike Eman, e salud di hende, e bida di hende of e placa? Placa sigur no ta importante pa Mike Eman pasobra si e ta dispuesto pa gasta 700 miyon den Green Corridor y Watty Vos Boulevard MESTER por tin placa pa cubri e gastonan mediconan di e aseguradonan aki. Mentalidad di AVP ta, placa ta mas importante cu bida di e ser humano!”, e Parlamentario a mustra.

 

“No solamete e maltrato di e aseguradonan aki ta cuestionabel sino e sistema di voucher cu a wordo introduci na e hotel Bella Nova na Colombia. Pashentnan cu bay hospeda na Bella Nova ta haya un 2 voucher pa dia cada un na balor di $10.

Un voucher di $10 pa lunch y e ortro di $10 pa dinner. Tin un abuso tumando lugar pasobra ningun di e cumindanan cu ta wordo ofreci bal $10. Mester conduci un investigacion profundo den e negoshi aki entre AZV y Bella Nova Hotel pasobra no por ta asina cu ta abusa di aseguradonan, kita $10 for di nan pa cada cuminda y ta haya un cuminda di calidad inferior. Un grupo di hende yega na AVP ta strikando placa bruto cu e sistema di voucher aki”, Dangui Oduber a continua bisando.

 

“Segun mi den KIA mes e cuminda ta mas miho! E abusonan aki lo caba cu MEP den gobierno. Sea ta construi un hotel na Colombia pa acomoda nos hendenan of mester busca mas dokter, mas ekipo pa trata nos hendenan na Aruba mes pero asina aki no por sigui!”, Dangui Oduber a duna di conoce.

Top