Dangui Oduber (MEP): Bid Fixing a bira practica standard di Gobierno di AVP!

“Bid Fixing a cuminsa afecta ciudadanonan na Aruba. No solamente Bid Fixing pa proyectonan manera renobacion di Caya Grandi, ampliacion di hospital, proyecto Green Coridor y tambe awo e extencion di Avenida Watty Vos ta un forma di corupcion unda cu amigonan of companianan yega na e partido AVP (lesa Mike Eman) ta haya e oportunidad pa sakea fondonan publico, tambe Bid Fixing a afecta e existencia di companianan grandi cu a sa di rindi servicionan di calidad na pais Aruba.

Por menciona e. o. Bohama, Albo, Arubaanse Wegenbouw y tambe Thiel Corporation cu no mester di mucho introduccion pa e simpel hecho cu nan tin varios proyecto grandi cu te awe ta un refleho di e calidad cu nan a sa di presenta riba Aruba”, segun Dangui Oduber.

 

Pa decadanan largo Aruba su companianan a sa di gosa di un confiansa enorme den proyectonan grandi y cu esaki mas cu claro tata y mamanan di famia a sa di pone pan riba mesa. E experiencia den e ramo di construccion tabata asina amplio cu proyectonan tabata keda perfectamente acaba y entrega sin mucho contratiempo y tin suficiente ehempelnan di esaki pa por menciona.

AVP y Mike Eman a cambia e rumbo: Desde 2009 cu Mike Eman a bira Prome Minister mester bisa cu e transparencia pa loke ta proyectonan a keda abuli, destaho publiconan a bira menos y Bid Fixing a haci su entrada den gran forma.

Compromisonan aheno mester keda prioridad di sr. Eman y casi sigur sr. Sevinger unda cu inversionista- y socionan di campania mester keda privilegia no matter si nan tin conocemento di construccion of laga. Te cu awor cifranan ta keda incierto pero tin pakico kere cu esakinan ta core den un biyon of mas”, Dangui Oduber ta splica.

 

“Empleadonan publico mesun culpabel cu politiconan corupto: Tin suficiente indicacionan di cual mester bisa cu un poco investigacion por hasta presenta pruebanan concreto cu tin actonan fraudulentonan tumando luga.

Por deduci esaki na momento cu ta bira demasiado ora cu DOW ta perde e autoridad pa por controla e proyectonan aki, y mas bien ta wordo uza como PR pa por defende y promove e proyectonan apesar di e calidad inferior, costonan abusivamente halto y tardansanan enorme.

Splicacionan cu hopi biaha ta asina fofo y ilogico ta parti di e forma con esnan responsabel pa DOW ta tribi di trece padilanti y sin laga afo e miedo y cobardia di contesta preguntanan relaciona cu corupcion y fraudenan cu sigur ta core riba custia di nos pueblo.

Y nos no tin miedo di menciona cu desde 2009 DOW mester por tabata na altura cu tin Bid Fixing den e proyectonan dudoso di Gobierno”, Dangui Oduber a continua bisando.

 

“Calidad pober, tardansa y incumplimiento ta refleho di Bid Fixing; Mester bisa cu por a mira e calidad pober, tardansa y incumplimiento di varios trabao otorga a base di e Bid Fixing saga. Proyecto di renobacion di Caya Betico Croes sigur ta un di nan y sin laga afo e aventura unico di e Linear Park dilanti di Talk of Town pa Wilhelmina Park unda cu contratistanan amigo di AVP a “walk away unharmed” di un escandalo nunca antes bisto na Aruba. Apesar cu mester a paga un dineral toch mester a injecta fondonan adicional pa otro companianan termina of improvisa rib’e proyectonan aki, mientras nunca tabatin un investigacion cu por a sikiera persigui esnan cu a literalmente horta placa di pais Aruba”, Dangui Oduber a indica.

 

“DOW di su parti a core haci algun trabao p’asina Benny Sevinger y DOW por a despista e atencion pa nan tambe por a keda “neat and clean” di e porkerianan aki. Costonan ta mucho mas halto den caso di Bid Fixing cu e meta pa complace, pay back of simplemente enrikece esnan envolvi den e tipo di escandalonan aki cu por cierto ta castigabel pa nos leynan penal, pero ta keda e pregunta e ora ken lo laga investiga e casonan individualmente.

Mientras cu esaki no tuma luga Aruba lo keda na merced di esnan cu ta antoha pa yega na placa facil sin nunca preocupa ta ken ta paga p’e y mas aun cuanto esaki ta bay costa e pueblo di Aruba en general”, Dangui Oduber a conclui.

Top