Dangui Oduber (MEP): Corupcion y falta di transparencia di Gobierno di AVP destrui nos pais!

Aki 74 dia pueblo di Aruba ta haya e oportunidad pa bay urna electoral y scoge su Gobierno na un manera democratico. Ta importante pa nos como politiconan duna pueblo informacion y ta transparente tambe cu e votadornan.

Un cos ta sigur riba 22 di september 2017, e Gobierno di AVP NO por bolbe!

E Gobierno di AVP ta e Gobierno di mas corupto den historia di pais Aruba.

Un Gobierno cu a inverti den infrastructura pa crea un netwerk di corupcion nunca antes bisto n’e pais aki. Mike Eman como Minister Presidente a insisti pa ehecuta proyectonan grandi manera Green Corridor, Watty Vos Boulevard y renobacion y ampliacion di hospital. E insistencia aki ta pasobra hopi placa a wordo reparti tras di cortina. Esey ta e realidad, segun Dangui Oduber.

 

Pa esnan cu no sa mi ta sugeri nan pa subi e website di Camara di Comercio https://www.arubachamber.com/ y busca e nomber di e compania cu ta maneha Green Corridor cu ta costa nos pueblo 400 miyon florin.

Busca e compania CARIBBEAN INFRASTRUCTURE COMPANY (CIC) y wak pa bo mes kende ta un di e managing directornan. Nada mas y nada menos cu sobrina di Leoncita Arends. E mesun Leoncita Arends cu a haya mas cu 120.000 M2 di tereno, NO pa desaroya sino pa pone na benta y specula cu tereno di pueblo.

Leoncita hunto cu Benny Sevinger a kita tereno for di pueblo pa nan haci negoshi cu nan. Di e manera aki na un manera structura y organisa a abusa di fondonan publico, abusa di terenonan di pueblo cu e unico meta pa enrikece E grupito ELITE di AVP, e grupito ELITE rond di Mike Eman y Benny Sevinger!

E problema mas grandi cu tin na Aruba banda di e costo di bida haltisimo, e problemanan social, e cuido medico mediocre, e criminalidad for di man ta e GRADO di corupcion na Aruba, Oduber ta splica.

 

Na e momentonan aki tin ex Minister of Minister, nos no sa mas, Paul Croes, en todo caso un Minister sin cartera ta cana cas ta pidi pueblo sosten sabiendo cu e NO ta ministreriabel n’e momentonan aki mirando cu e ta bao di un investgacion penal.

Un investigacion riba soborno y corupcion caminda ta tilda e Minister di ta meti den bendemento di permiso. Hecho ta cu e Minister en cuestion a duna 1800 ONTHEFFING y asina a kita pan di 1800 persona cu ta biba rib’e pais aki.

El a duna ontheffing pa hardinero, pa security, pa waitress, pa koki y asina na un cantidad di profesion cu NO mester busca hende di afo pa nan.

Un decadencia total caminda politiconan cu mester duna e bon ehempel ta duna e mal ehempel canando buscando voto manera nanda NO a sosode siendo cu keto bay e NO a wordo delcara liber di e acusacionnan hopi serio cu tin den su contra!, Oduber ta mustra.

 

Tin varios keho a wordo entrega na Ministerio Publico contra Minister Benny Sevinger relaciona cu speculacion cu tereno y te dia di awe Ministerio Publico no a haci nada nada rib’e casonan aki. Tin bendemento di permiso di trabou, tin bendemento di permiso di estadia, casa di Ministernan mes ta fungi como tramitadora, casa di Minister ta bende santo y piedra na Green Corridor y tur esaki e pueblo mester guli manda abou y acepta. Un Gobierno corupto mester wordo manda cas pasobra politiconan t’ey pa sirbi pueblo, sirbi pais, sirbi interes general y no pa sirbi nan propio interes, interes di nan cartera y interes di e grupito ELITE di Canal 90.

E pueblo aki su hendenan NO a progesa y ora bo mira con Ministernan ta biba, con e grupo Elite ta biba nos tur tin cu para keto un rato y puntra nos mes, unda tur e biyonesnan nan cu Mike Eman a endued nos pais a bay? Kende ta esnan cu realmente e beneficia di 8 aña di AVP! E contesta ta simple, e grupo Elite di AVP cu a haya tur loke nan a pidi, Oduber ta remarca.

 

Un Gobierno cu ta corupto y no ta transparente no merece sosten y confiansa mas di pueblo. Un Gobierno cu NO kier duna cuenta na pueblo y cada bes ta sconde informacion na pueblo y ta core pa asumi nan responsabilidad mester bay.

Corupcion a caba cu hopi pais na mundo, BAN NO LAGA ESAKI SOSODE CU NOS DUSHI ARUBA!, Dangui Oduber ta conclui.

Top