Dangui Oduber (MEP): Den proximo Gobierno di MEP tur federacion deportivo lo ricibi mas placa!

“Durante e ultimo 8 añanan deporte a wordo lubida, neglisha y poni na ultimo lugar pa Mike Eman y e Gobierno di AVP. Pa e ultimo 8 añanan aki Aruba no tabatin un Minister di Deporte, pasobra sino deporte no ta caminda cu e ta actualmente.

Ningun atencion a wordo duna na facilidadnan y mucho menos na deportistanan.

Ta tristo pa constata con a lubida riba deporte y deportistanan.

Deporte ta algo cu Gobierno mester duna hopi mas atencion mirando cu no solamente e ta sano y saludabel sino e ta tene muchanan for di Caya. Ta practicamente tur siman mester mira con muchanan ta bende rifa sea na supermarket, gasoline station of riba caya pa yega na fondonan pa cumpra material”, Dangui Oduber ta splica.

 

“Tur entrada cu Lotto pa Deporte ta genera y cu den pasado tabata wordo inverti den deporte a wordo poni den man di Canadian bank Note.

Gobierno di AVP bao maneho di Mike De Meza y Richard Visser na aña 2012 a cera un acuerdo cu Canadian Bank Note pa traspasa tur entrada di Lotto pa nan y laga nan maneha Lotto pa Deporte for di Canada. Un decision robes y un decision cu a perhudica deporte enormemente.

Mester tin basta hende cu a saca beneficio propio for di e acuerdo aki pasobra Lotto pa deporte ta genera miyones di florin y nos NO ta mira esaki bek den deporte”, segun Oduber.

 

“Pa haci e situacion un tiki mas pio, e Gobierno di AVP a haya ta bon pa cera un acuerdo cu e grupo Canades pa 15 aña. Pais Aruba ta mara na 15 aña di contract cu Canadian Bank Note cu ta strika miyones di florin sin cu deporte ta mira esaki.

Pa nos pueblo haya un bista y un idea cuanto placa e grupo aki ta strika ta bon pa nos informa pueblo cuanto entradanan di Lotto pa Deporte ta.

Lotto sigur ta genera 45 miyon florin pa aña. Di e suma aki Canadian Bank Note mester paga e gastonan operacional di Lotto, e mester paga tur e premionan y tambe duna 3 miyon na e subsidie commissie cu na su turno ta duna placa na tur e fundacionnan di deporte”, e Parlamentario ta continua bisando.

 

“Actual Minister di Deporte a admiti y a reconoce cu e contract firma cu Canadian Bank Note cu Mike De Meza a firma ta uno masha malo y desatroso mes pa deporte y a renegocia esaki. El a admiti cu pa e ultimo 4 añanan deporte di Aruba a perde 28 miyon florin cu e contract firma cu Canadian Bank Note. Tur esaki lo conoce cambio den un proximo Gobierno di MEP.

Nos ta kere den deportistanan, nos ta kere den deporte y ta p’esey nos lo duna deporte e atencion cu e merece. Nos lo pone yerba artificial riba e veldnan y banda di esaki nos lo aumenta subsidio na tur e federacionan deportivo. E suma di placa cu cada federacion ta haya ta mucho abou y cu e confiansa di e votador nos lo trece cambio den esaki.

Cada federacion por conta cu sosten di e proximo Gobierno di MEP cu nan lo conoce un aumento den e subsidio cu nan ta ricibiendo”, Dangui Oduber a duna di conoce.

Top