Dangui Oduber (MEP): E ley cu e cambionan di kiesverordening a bay Conseho Consultativo

Siman pasa e ley di iniciativa cu e cambionan di e kiesverordening a wordo entrega na Presidente di Parlamento drs. Mervin Wyatt Ras.

Mirando cu tin urgencia pa trata e ley aki prome cu eleccion 22 september 2017 nos ta spera cu e ley aki por encamina e proceso mas liher posibel.

Manera cu e ley aki a drenta Parlamento e proceso aki a cuminsa y e ley a yega Conseho Consultativo (Raad van Advies) pa nan por duna nan conseho riba esaki, segun Dangui Oduber.

 

Di e momento cu e conseho aki yega bek Parlamento nos lo traha riba esaki p’e ley ta cla pa wordo trata den sala di Parlamento.

“Nos ta spera cu Presidente di Parlanento cumpli cu deseo di pueblo y yama e reunion aki p’asina nos por yega na un votacion.

E ley di iniciativa aki ta uno cu ningun politico a mishi cune y entregu’e p’asina e encamina e proceso pa wordo trata.

 

Cu e cambionan cu a wordo proponi e siguente eleccion pueblo por scoge su representante di Parlamento por medio di cantidad di voto.

E secuencia di number ta wordo elimina y esnan cu mas voto t’esnan cu lo representa pueblo den Parlamento.

Como representante di pueblo bo mester por carga sosten den pueblo pa por represente y no manera t’e caso aworaki caminda tin miembronan di Parlamento cu 47 voto ta den sala ‘’represantando’’ pueblo.

 

E ley aki si tur cos ta bon mester por carga aprobacion unanime di sala. Esnan cu NO ta sostene e ley aki sea tin profesion robez of kier haya un ‘’lift’’ pa drenta di Parlamento.

Cu e ley aki esnan cu traha duro, busca e voto ta wordo recompense y ta drenta Parlamento automaticamente.

Nos ta spera cu Raad van Advies por entrega e ley aki mas pronto posibel bek na Parlamento mirando cu e no ta algo complica y no ta necesario pa tuma hopi tempo riba dje.

E intencion ta p’e ley aki wordo trata no mas tarda aki 6 siman”, segun Dangui Oduber.

 

 

Top