Dangui Oduber (MEP): Gobierno di AVP a haci tur corupcion bira LEGAL!

E ta obvio y bisto cu e Gobierno di AVP bao liderasgo di Mike Eman a haci tur practica di corupcion bira legal. Ta parce cu e gobernantenan di AVP a perde gevoel y no tin cuero di cara. Ta masha hopi corupcion a tuma luga e ultimo 8 añanan aki.

 

Tin un raport cu a wordo traha riba otorgamento di permiso y e conclusion tabata cu pa haya algo regla cerca Gobierno mester paga.

Asina e Gobierno aki a duna un famia mas cu 120.000 M2 di tereno pa pone na benta. Cua ciudadano ta haya 120.000 M2 for di Gobierno pa bende?

No solamente e famia a haya tereno pa bende sino coordinador di Minister Sevinger tambe ta haya tereno pa bende, segun Dangui Oduber.

 

Banda di esaki, señora di coordinador ta tramita permiso cu e casa mes ta fix cu Minister Sevinger. Mas leu aun propio casa di Minister ta fix permiso y ta tramita permiso. Ta bon pa pueblo ta informa kende tin e negoshi di tramita permiso cu yama Red Apple y kende ta e Minister encarga pa firma e mesun permisonan cu su señora mes ta tramita, Oduber ta splica.

 

Pa 8 aña, OM tabata na soño y despues di 8 aña a bin realisa cu tin negoshi cu permiso. Nos no sa kico lo ta e resultado di e investigacion contra Minister Paul Croes pero hecho ta cu a haci un inval pisa na cas y tambe a gara un trahador ilegal na su cas. Na momento cu gara un persona ilegal ta traha na cas caba ta un acto castigabel pa ley, pero pa Gobierno di AVP tur cos a bira normal y tur cos ta legal.

 

Partido AVP no tin integridad y mucho menos moralidad. Loke nan ta haciendo cu e pais aki ta duna e ehempel cu tur cos malo ta bon. Nan semper kier praat recht wat krom is.

Mirando tur loke ta pasando rib’e pais aki partido MEP a bisa cu ta basta cu tanto corupcion. Mester bin un ley di integridad cu porcierto partido MEP ta trahando riba dj’e p’asina por entrega esaki na presidente di Parlamento, Oduber ta enfatisa.

 

Banda di esaki, mester bin cu e ley di financiamento di partidonan politico.

Nos ta nota cu aña di campaña patido AVP tin masha hopi placa disponibel pa campaña siendo cu nos nunca a mira of tende cu nan lo a tene un fundraising.

Anto e ora e pregunta principal ta surgi, ta di unda tur e placanan aki ta bin?

Ta kende ta esnan cu ta financia campaña politico di AVP?

Kende ta esnan cu ta wordo beneficia durante period di gobernacion?

Pasobra ta obvio y bisto cu e puebo no a progresa e ultimo 8 añanan aki y ta e grupito di friends with benefits a haya tur cos, Oduber ta continua bisando.

 

E famia Arends cu ta doño di AVP a haya tereno, a haya contract di radio, tur sobrinonan a haya contract di mas cu 10,000 florin pa luna, a haya a contract pa transporta materialnan di hospital.

Tur loke ta pasando mester yega na un fin. No por ta asina cu AVP ta goberna pa famia y ta lubida rib’e homber chikito, ta lubida rib’e pueblo!

Mester bin un cambio pa pone hendenan responsabel y integro den Gobierno, Dangui Oduber a duna di conoce.

Top