Dangui Oduber (MEP) Gobierno di AVP sinonimo na corupcion!

“Corupcion, situacion financiero deplorabel, medida, gañamento y asina mi por sigui cu mas cos negativo di e Gobierno aki.

Na Hulanda nan sa bisa “in het land der blinden is een oog koning”, Minister President, Mike Eman a kere e dicho aki lo conta pa Aruba.

Bo por gaña un pueblo, bo por menasa contricante politico, persigui pueblo pa nan color politico, pero bo no por para e boluntad di un pueblo”, segun Dangui Oduber di MEP.

 

Dia 22 di september awor Aruba lo tin oportunidad despues di 4 aña pa dicidi rumbo di gobernacion di Aruba.

Aruba merece un economia stabil y cu ta crece atrobe, Aruba merece pa biba den seguridad, Aruba merece scolnan renoba y nobo, pueblo di Aruba mester di un alivio financiero.

 

“Nos tur sa cu e belasting na Aruba ta un di esnan mas halto na mundo, pero ora nos puntra nos mes ta kico ta sosode cu tur e entrada aki den caha di Gobierno, nos ta mira cu prioridadnan ta completamente robes.

Biahamento, conferencia, fiesta y nepotismo ta na orden di dia. Nos Tata Todopoderoso a semper duna nos dushi isla e bendicion pa por briya, pero ora gobernantenan lubida e esencia di bida, e importancia di ta honesto y integro nos ta yama e maldad y maldicion riba nos”.

 

Segun Dangui Oduber, mester crea oportunidadnan nobo pa nos hobennan, nos hubentud mester tin e bon ehempel pa por crece den nan bida, mester tin comprension y amor pa otro bek y finalmente mester di un cambio den Gobierno.

Dangui Oduber ta convenci cu mañan lo bira mihor pa nos tur!

 

 

Top