Dangui Oduber (MEP): Kico a pasa of kico no a pasa?

“Awe nos pais ta parce un barco sin capitan, nabegando den lama bruto sin direccion. Nos pais durante ultimo decadanan a conoce diferente generacion di lidernan cu cada un riba nan tereno a sacrifica nan tempo y famia pa traha incansablemente pa nos dushi Aruba por supera e olanan halto su dilanti y progresa.

Nos hubentud tabatin e oportunidad pa studia cu hopi motivacion pa logra nan metanan y bolbe bek pa contribui.

Sinembargo awendia kico a pasa? Mi ta topa cu hopi hoben mescos cu mi y nan ta hacimi e pregunta aki, kico ta pasando ultimo añanan.

Nan no ta sinti motivacion pa nan futuro y ni pa bolbe bek si nan bay afor pa studia. Ora mi contesta e pregunta aki, e contesta ta obvio; no ta cuestion di kico a pasa, sino ta mas bien kico no a sosode den nos comunidad”, segun Dangui Oduber di MEP.

 

Awe Aruba tin un Gobierno cu a perde autoridad y firmesa, un Gobierno cu practicamente no tin liderazgo cu ta sirbi e comunidad sino mas bien nan mes of interes di nan campañador y gruponan di interes. Pues ausencia di un Gobierno cu autoridad a crea efectonan negativo cu awe nos pueblo ta sufri e efectonan.

Pueblo ta bibando e efectonan aki den su bida priva y social. Sea bo ta bay banco, trabao, haci compras den ciudad, bay beach of bay recrea bo ta sintibo insigur pasobra delicuencia a logra penetra.

 

Nos pilar economico mas importante tambe a bira victim regular di criminalidad manera nunca antes. Sinembargo e manera di traha di e Ministro di Husticia a keda mescos, culpa otro y un excusa tras di otro pa hustifica su maneho sin autoridad.

Por bisa cu awe nos tin un Ministro di Excusa y no di Husticia.

 

Segun Dangui Oduber, recientemente a tuma lugar un otro caso di asesinato dilanti nos hotelnan, ni 100 meter leu di kambernan di nos huespednan. Niun musca a bula, e mesun siman atraconan ta sigui azota nos poblacion, marando yiunan y mayornan den nan den cas. Niun musca ta bula atrobe.

Enbes cu nos pais tin Ministernan cu ta interveni den asuntonan pa resolve e problema y menasanan cu nos pueblo y bishitantenan tin cu soporta nan a scoge pa pone atencion nan nan  mes.

 

“Siman pasa atrobe dos atraco den menos di 24 ora y hasta menasa di secuestro di un baby sino duna e atracadornan placa. Pueblo di Aruba ni den su propio cas no tin pas y trankilidad mas.

Esaki ta algo grave cu nunca a pasa nos den nos pais. Di unda ta sali delincuencia por cambia bida den comunidad y hasta den nos propio cas.

Pesey mi ta bisa no ta cuestion di kico a pasa, mas bien ta kico no a pasa”, Dangui Oduber a sigui declara.

 

No a duna liderazgo, atencion y accion pa prevencion di crimen den nos comunidad. E Minister di Asunto Social awe no tey, pasobra cu e tambe a sigui su coleganan y no a pone prioridad robes.

Pero awe mi kier bisa un y tur, ami Dangui Oduber hunto cu mi coleganan di partido lo pone un punto final n’e decadencia aki di falta di liderazgo y autoridad.

Nos lo restablece orden den nos barionan y proteha nos industria turistico y economia engeneral di Aruba.

 

Enbes di excuus, nos lo tin un compromiso firme pa atencion, accion y esfuerso maximo pa combati criminalidad y restablece trankilidad y felicidad pa nos pueblo y nos bishitantenan.

Nos lo traha cu tecnologia moderno manera “Crime Fighting Drones”, Nos lo introduci un sistema di mobile crime prevention cu comunicacion avansa p’asina expande capacidadnan pa prevencion y represion di nos Cuerpo Policial.

Nos lo traha y sirbi nos pais incansablamentw pa pueblo por tin oportunidad pa traha cu optimismo, hubentud studia cu inspiracion y despues di trabao famianan por biba normal y recrea cu nan yiunan y anochi sosega anochi cu trankilidad”, ta otro promesa di Dangui Oduber.

 

Leave a Reply

Top