Dangui Oduber (MEP): MEP lo crea perspectiva pa nos hobennan! Nos ta kere den nos hobennan

 

 
“Na e momentonan aki e desempleo bou di nos hobennan ta mas cu 30%. 1 di cada 3 hoben ta sin trabou y sin perspectiva. E Gobierno di AVP a haci e situacion aun mas dificil pa nos hobennan cu nombramentonan politico y faboritismo y sigui e cambio di edad di pensioen pa 65 aña a hacie dificil pa nos hobennan por haya un trabou”, segun Dangui Oduber.

 

“Den ultimo 8 aña si bo ta un hoben, pa bin na remarke pa haya trabou bo mester por a cana cu Mike Eman of mester a haci e promesa cu bo lo bay cana cu ne den eleccion cu ta na caminda.

Hobennan ta demotiva, hobennan no ta haya e oportunidad cu nos mester crea pa nan. Si bo no tin un partijdiploma di AVP lubida cu bo ta haya un trabou.

Den e 137 coordinadornan di Mike Eman gran mayoria ningun a caba un scol secundario pero tur ta cobra salario di average 5000 florin pa luna.

Decisionnan asina ta kibra e moral di e hoben studiante cu ta fia placa, hinca su curpa den debe pa ora e bin bek su pais no tin trabou p’e pasobra e no a core campaña pa AVP”, sr. Oduber ta splica.

 

“Esaki ta e tristo realidad cu nos hobennan ta pasa aden na e momentonan aki.

Ami como hoben t’ey pa nos hobennan y sigur lo traha pa yuda e siguiente generacion cu ta bin despues di nos. Ta nos tarea y obligacion pa crea oportunidadnan nobo y posibilidad pa nos hobennan por yega na un trabou cu finalmente lo conduci na un carera profesional. Nos tin cu duna nos hobennan e atencion cu nan merece.

Hobennan a wordo lubida por completo. No tin trabou pa esnan cu ta na Aruba, ora esnan gradua den exterior y dicidi pa bin bek no tin trabou pa nan y esaki ta hopi frustrante. No solamente trabou ta un problema serio sino vivienda.

E Gobierno aki a priviligia un famia cu mas cu 100.000 M2 di tereno pa bende y e hoben mes no a bin na remarke pa un tereno. Na momento cu un hoben bin bek su pais e ta busca un trabou, e no ta hay’e, e ta busca un tereno, e no ta hay’e, ki perspectiva un hoben asina tin riba su mesun pais?”, e Parlamentario ta cuestiona.

 

“Tin hopi pilar economico cu por yuda crea empleo. Nos mester cuminsa pensa den direccion di e-commerce caminda mester cuminsa prepara leynan pa haci esaki mas facil pa lanta negoshinan cu kier haci e commerce. Banco Central mester ta mas flexible den esaki. Nos no por keda atras cu tur e desaroyonan di tecnologia.

Nos mester cuminsa haci uzo di e oportunidadnan cu tecnologia ta brinda nos. Stimula nos hobennan cu nos tin e capacidad pa haci cosnan grandi.

Nos mester elimina tur redtape cu tin existente ora un hoben kier lanta su propio negoshi. Mester por tin e posibilidad di banco pa reduci interes pa comerciantenan nobo y hoben. Duna nan un speransa cu na Aruba por haci negoshi facil y haya placa fia na un interes faborable. Ta cosnan cu na e momentonan aki no tin”, e Parlamentario ta mustra.

 

“Otorgamento di tereno mester bay na un manera transparente y mester percura pa tur peticion di tereno di pueblo y di nos hobennan wordo acomoda. No mester bay paga of roga Minister pa un tereno. Nos mester di transparencia. Tur hende mester por sa kende a pidi tereno, kende a haya tereno y pakico a haya tereno.

Nos tin cu inverti hopi mas placa den enseñansa, no solamente den cosmetico sino den contenido. Enseñansa mester bira atractivo pa nos hobennan. Deporte a wordo lubida y neglisha y aki tambe nos partido lo bay inverti den esaki”, sr. Oduber ta sigura.

 

“Nos hobennan ta nos futuro di mayan y si nan wordo neglisha manera a sosode e ultimo 8 añanan aki nos pais NO lo tin futuro. Ami ta kere den e potencial di nos hobennan, mi ta kere den un miho mayan pa nos hobennan y mi lo traha dia y anochi pa haci esaki posibel pa nos hobennan y nos hendenan tin un miho mayan!”, Dangui Oduber a duna di conoce.

Top