Dangui Oduber (MEP) Mike Eman y Arthur Dowers cabando cu nos unico pilar economico

E situacion cu tin for di hopi tempo caba cu criminalidad ta alarmante. Aña pasa tabata un aña record pa loke ta trata cantidad di atraco y a yega e record di mas cu 50 atraco den 1 aña di tempo. Esaki tabata 1 atraco pa siman.
E aña aki no a habri diferente y n’e momentonan aki tin ya caba 22 atraco registra den e prome 2 luna y mey di aña 2017.
Nos ciudadanonan ta wordo atraca, bati y maltrata den nan propio cas. Deportistanan ta wordo atraca riba caya y awor ni turistanan no scapa di e ola di criminalidad cu tin n’e momentonan aki, segun Dangui Oduber di MEP.

E siman aki so tin 3 atraco registra riba turistanan y asina aki Mike Eman y Arthur Dowers ta hungando cu pan di nos hendenan.
Nos pais ta un di e paisnan cu mas ta depende di turismo t’esaki ta loke nos tin cu ta produci entrada pa hopi famia na Aruba.
Na momento cu turistnan ta wordo atraca cu arma di candela manera ta sosodiendo e ta pone henter nos pais na peliger y nos ta bayendo den direccion di Jamaica.

E ta lamentabel cu Prome Minister ta di biaha atrobe, ausente y Minister di Husticia tanto bal e tey of laga di tey, pasobra nada no a cambia den e maneho di combatimento di criminalidad.
Na Aruba e criminalnan tin mas arma di candela cu nos mesun Polisnan. No tin un plan di accion di parti Minister Dowers pa garantiza nos pueblo nos seguridad.

No tin un plan di prevencion pa nos por sinti nos mes sigur riba e pais aki. Loke tin ta un maneho represivo despues cu nos hendenan wordo atraca y maltrata y awor tambe turistanan.
E situacion di criminalidad a yega su limite y un Minister manera Dowers a demostra un incapacidad enorme pa resolve e problemanan serio cu tin.
Tin un crisis serio den e maneho di husticia y Dowers no kier acepta y reconoce esaki.

No por t’asina cu nos ta biba cu miedo den nos cas, miedo pa wordo atraca, miedo pa sali bay anta placa, miedo pa bay supermercado anochi.
Nos pais no tabata asina aki. AVP ta cabando cu nos pais y nan ta cabando cu nos turismo. Ningun hende ta sigur mas riba e pais aki y nos ta exigi nos seguridad y nos trankilidad.
MEP lo pone enfasis riba e maneho preventivo. Nos lo bin cu mas Polis riba caya, nos lo bin cu Polis specialmente dedica pa barionan y tambe den areanan turistico.
Mester bin control riba nos costanan, mester bin control rigoroso riba armanan di candela ilegal.

Nos mester pone ordo bek den e desorden cu tin na Aruba actualemente. Nos lo mester bin cu leynan pa aumenta castigo riba crimennan cometi. E situacion simplemente no por sigui asina, di acuerdo cu Dangui Oduber.
AVP mester bay, pasobra nos pueblo merece di biba den paz y trankilidad. AVP no por garantiza nos esey y e ola di criminalidad cu tin actualmente ta demostra esaki.

Top