Dangui Oduber (MEP): Nos NO mester midi turismo basa riba HEADCOUNT (cantidad)!

Pa e ultimo 8 añanan aki turismo a wordo midi pa headcount, es decir pa cantidad di turista cu a bin nos pais. Esaki no t’e miho manera pa midi e exito di nos turismo, pasobra na final di dia e no ta bay pa cuanto turista a yega nos pais sino cuanto placa nan a laga atras. E Gobierno di AVP p’e ultimo 8 añanan aki tabatin e tendencia di midi e exito den turismo segun nan na cantidad. Si ta esaki ta e manera cu turismo ta wordo midi anto e ora Gobierno ta completamente robes, segun Dangui Oduber.

 

Si kier analisa nos producto turistico mester mira cuanto cada turista ta gasta durante su estadia y tambe kico nan ta gusta haci ora nan yega Aruba.

Mayoria turista cu ta bin Aruba ta yega via aeropuerto. E turismo cu mas ta creciendo den Caribe ta e turista impulsivo. E balor di un turista cu ta gasta $1500 pa dia nunca por iguala esun di un turista cu ta gasta $50 pa dia. Turistanan cu ta gasta hopi placa pa dia ta turistanan impulsivo. Nan no ta planea nan vacacion adelanta. Nan ta sinti e necesidad pa bay cu vacacion y ta haci esaki den transcurso di dianan, Oduber ta splica.

 

E vision di partido MEP ta completamente diferente cu esun di partido AVP y partido POR. Partido MEP ta kere den un turismo solido y duradero caminda lo midi turismo a base di e cantidad di placa cu cada turista ta laga atras.

E calidad di turismo ta hopi mas importante cu cantidad di turismo. Nos ta desea di traha conhunto cu tur e stakeholdersnan den turismo p’asina hunto formula un vision p’e proximo 20 añanan caminda tur hende ta mira den e mesun direccion.

Nos ta kere cu nos mester expande e cantidad di cambernan di hotel pero na un manera serio y resposabel teniendo cuenta cu tur stakeholdersnan y tambe teniendo cuenta cu deseo di comunidad.

Nos ta kere den desaroyonan estilo boutique hotel cu actualmente ta e trend mundialmente. Nos no ta kere y no ta para pa desaroyonan di mas cu 350 camber di hotel pasobra e ta bira un peso adicional cu pais Aruba no por carga esaki, Oduber ta mustra.

 

Turismo su exito mester wordo sinti den tur skina na Aruba y durante ultimo 8 añanan esaki no tabata e caso. Si nos para keto un rato y wak cuanto hotel a wordo bendi durante ultimo añanan aki ta un indicacion cu algo a bay robes den nos turismo. Westinn a wordo bendi cu RIU, Occidental a wordo bendi cu Barcelo, Radisson a wordo bendi cu RIU, y finalmente The Mill a wordo bendi cu Courtyard Marriot.

Nos ta papiando aki nan di 5 cadena hotelero cu a wordo bendi durante ultimo 8 añanan. Un doño di hotel ta bende su hotel na momento cu e ta perdiendo placa sino nunca e lo pone e hotel na benta. Si turismo tabata asina bon manera AVP ta pretende anto ta dicon asina tanto hotel a wordo bendi.

Partido MEP tin un plan y vision pa nos turismo y nos ta spera cu nos logra haya e mandato di nos pueblo votador pa ehecuta e plan aki, Oduber ta termina bisando.

Leave a Reply

Top