Dangui Oduber (MEP):E ley cu e cambionan di e Kiesverordening ta cla!

“Como politico bo mester bisa loke bo ta bay haci y haci loke bo ta bisa. Mi a anuncia algun luna atras cu lo haci cambionan den e Kiesverordening y asina presenta un ley di iniciativa cu e cambionan aki y awor esaki a keda cla y ta wordo entrega awe na Presidente di Parlamento”, asina e miembro di MEP, Dangui Oduber a anuncia.

Pa decadanan largo e Kiesverordening no a wordo cambia y adapta y a yega e momento prome cu eleccion 2017 p’esaki wordo cambia.
“Como politico nos mester duna oido na deseo di pueblo y e pueblo ta anhela cambionan di e Kiesverordening. N’e momentonan aki un representante di pueblo ta wordo scogi por medio di voorkeurstemmen of por medio di su number riba lista politico.
E ley aki no ta uno husto y tampoco ta refleha deseo di pueblo den e cas di pueblo.

Tin hopi politico ta haya confianza y sosten di pueblo, pero finalmente no ta drenta Parlamento pa motibo di e ley y e sistema cu nunca a wordo cambia.
Den e constelacion actual di Parlamento tin Parlamentarionan cu a haya 47 voto y den e mesun partido tin otro cu a figura mas patras riba e lista y a logra haya 427 voto cu ta casi 10 biaha mas hopi voto cu esun cu a drenta Parlamento.
E no ta husta y tampoco representativo pa deseo di e pueblo aki. Un miembro di Parlamento di Aruba mester ta un persona cu ta representa e deseo di pueblo durante eleccion”, segun Dangui Oduber.

E cambio di e Kiesverordening ta algo cu mester wordo haci p’e por ta representativo pa deseo di pueblo.
Dangui Oduber ta bisa di no ta kere cu por tin un politico of un miembro di Parlamento cu por ta CONTRA deseo di pueblo y CONTRA e cambionan aki.
P’e ultimo 3 lunanan aki a traha riba e concepto di ley aki y finalmente, manera anuncia esaki a keda cla.

Si haya aprobacion di mayoria di sala cual Dangui Oduber ta convenci cu e lo haya, un miembro di Parlamento lo wordo eligi basa riba e cantidad di voto cu e ricibi durante eleccion benidero y no a base di numeracion/secuencia mas manera t’e caso actualmente.
E politico of partido politico cu ta contra e cambionan aki no merece confianza di pueblo, pasobra nan no kier cambia e sistema y kier mantene e kiesverordening antigua aki y tin miedo pa mehora e sistema.

“E lider politico cu no kier sostene e cambionan aki tin miedo di perde e poder cu e tin como lider di partido.
E cambionan aki mester bin na vigor prome cu eleccion 2017 y mi ta spera cu e reunion publico aki wordo yama mas pronto cu ta posibel pa trata e cambionan aki pa yega na un votacion pa pueblo por huzga kende ta para pa cambio, kende ta para pa progreso, kende ta para pa mehoracion di democracia y kendenan ta keda mara n’e manera tradicional y Antigua”, Dangui Oduber a conclui.

Top