Debi cu E. de Veer Chain Theaters no a cumpli cu tur condicion, Huez no a honra nan peticion (ainda) pa otorga nan e tereno pidi

Ayera mainta, Corte a duna su veredicto den e caso cu E.de Veer Chain Theatres a entama contra gobierno pa un tereno pa construi un cinema nobo. Huez a rechasa e demanda aki, esta pa forza Gobierno pa otorga e tereno pidi, cu ta un un tereno di 5.500m2 na Palm Beach, pa cual nan a haya opcion for dia 5 di januari 2017, pero cu Gobierno no tin fin di traspasa e tereno, esta duna E de Veer Chain Theaters erfpacht, p ‘asina nan por cuminsa construi.

 

Papiando cu abogado di E. de Veer Chain Theaters, mr. Patrick Brown, el a splica su cliente a dicidi di hiba Gobierno Corte, ta pa forza nan tuma un decision, despues cu na nan opinion a cumpli cu tur condicion cu Gobierno a stipula pa por haya e opcion.

Pero awor Huez ta haya cu no t’asina cu E de Veer Chain Theaters no a cumpli cu tur condicion y cu ainda falta.

Nificando cu su e compania cumpli cu loke cu falta, Gobierno ainda lo por duna nan e tereno solicita den erfpacht. Pero e hecho cu nan a cuminsa e caso hudicial aki, ta meramente pasobra Gobierno ta tardando pa tuma un decision y via di Corte nan kier a forza un decision.

 

Abogado mr. Patrick Brown no ta sinti cu su cliente a perde e caso, pasobra ainda E. de Veer Chain Theaters lo por haya e tereno, pero falta pa cumpli cu algun condicion ainda, cu sigur nan a cuminsa traha riba nan caba.

Sigur e veredicto aki ta laga un sabor amargo, pasobra aki su cliente lo por wordo perhuidica, awor cu nan kier haci un inversion cuantioso, cu lo yuda economia di Aruba, pero Gobierno mes no ta duna su banda. Pesey nan ta decepciona.

 

Pa loke ta posicion di Aruba Birdlife Conservation, den e veredicto Huez no a duna nan ponencia mucho atencion pa por yega na su veredicto. Gobierno a enfatisa cu E. de Veer Chain Theaters mester warda y tin pasenshi pa proceso cana su caminda.

Y manera abogado mr. Patrick Brown a duna di conoce, porta ta habri ainda, pa haya e tereno na erfpacht, y cu nan lo bay solicita prolongacion di e opcion, pa cumpli cu tur condicion cu falta ainda.

 

Pero e preocupacion ta, cu E. de Veer Chain Theaters lo no por keda cla, den e tempo cu nan mes a stipula pa habri un Cinema supermoderno. Y consecuentemente, e lo por costa mas placa.

E ta un proyecto, cu si nan a haya e tereno na erfpacht awor, lo keda cla despues di 52 siman di construccion cu lo consisti tambe di inversion grandi di un asina yama ‘sistema IMAX’.

 

E compania no kier perde e contract exclusivo aki cu IMAX (cu aparentemente lo brinda exclusividad na Aruba den ramo di Cinema) y sufri consecuencia financiero pa via di tardansa cu procedura di otorga tereno como erfpacht.

Awor ta sali na cla cu di acuerdo cu un raport di DOW, nan kier pa haci mas investigacion riba e tereno prome cu construi.

 

Pa loke ta fundacion, Aruba Birdlife Conservation, cu via nan abogado a pidi e partidonan pa por haya e documentonan a keda rechasa y como tal nan no tin arte ni parte den e veredicto di Huez.
ABC tin tur derecho pa cuminsa un caso contra di E. de Veer Chain Theaters y tambe contra di Gobierno. Si nan lo haci’e no ta conoci.

 

Puntrando abogado mr. Patrick Brown cual t’e proximo paso, el a duna di conoce cu E. de Veer Chain Theaters lo pidi extension di e opcion, hayando asina mas tempo pa cumpli cu tur condicion cu falta ainda pa nan por haya erfpacht riba e tereno pidi. Pa loke ta algun preocupacion extra p.e. di ABC, cu e sitio ta puro lodo, e inversionistanan aki a duna Gobierno un splicacion y presentacion detaye di e situacion aki.

Su clientenan ta serio den nan meta, y cu kier constribui cu economia di e pais aki, sin garantia di Gobierno, pero un biaha mas burocracia gubernamental ta un estorbo atrobe.

Top