Debi na falta di avion InselAir a hay’e forza di cancela algun ruta

 

Na Aruba, no tin placa pa cumpli cu obligacionnan financiero

 

Di parti di InselAir, nos a haya un comunicado di prensa, den cual e compania ta menciona cu debi cu parti di nan flota di avion ta grounded ainda na Aruba, InselAir ta hay’e forza pa cancela algun ruta cu e compania a bin ta bula.

Esaki for di diarazon awor, InselAir no ta sirbi Barquisimeto, Caracas, Georgetown, Haiti, Havana, Kingston, Las Piedras, Manaus, Medellin, Miami, Paramaribo, Port of Spain, Santo Domingo y Quito.

 

Si lo sigui cu e conexionnan entre Aruba, Bonaire, Corsou y St, Maarten. Asina cu e flota ta completo atrobe, InselAir lo re-lanza e rutanan cancela. Tur pasahero ta debidamente informa di e cambionan aki.

InselAir ta spera cu pa luna di juni di e aña aki, nan ta normalmente den operacion atrobe.

E pasaheronan cu tin pasashi cumpra caba, por haya nan placa bek.

 

MAS PROBLEMA

InselAir ta sigui confronta problema e.o. na Aruba, unda Aruba Tourism Authority a dicidi di pone beslag riba cuentanan bancario, despues cu Departamento di Impuesto a lanta su beslag.

Puntrando e CEO di ATA, sra. Ronella Tjin Ajoe, motibo di e beslag di parti di ATA, el a bisa cu nan tin palabracion cu InselAir pa paga pa cada pasahero cu InselAir trece Aruba un levy di 10 dolar pa pasahero.

Pero nan tin hopi tempo sin cumpli y e montantenan aki a subi keda subi, sin cu InselAir a cumpli. Te cu ayera tardi, no a cumpli ainda.

 

Dialuna ultimo tabata turno na Aduana, cu tambe a laga ground e avion Fokker 50 di InselAir tambe pa debe cu InselAir tin cu Aduana na Aruba.

E beslag aki tabata breve, pasobra InselAir a paga y a laga e avion liber pa sigui su buelonan.

 

Pa loke t’e trahadornan cu for di diabierne no a cobra, te cu ayera ningun di nan no a cobra nan salario tampoco. Di parti di e compania madre na Corsou, nan no ta dispuesto pa injecta ningun florin den InselAir Aruba. Pesey no keda sorprendi si e trahadornan aki pidi bancarota InselAir Aruba, mirando cu tog e compania no ta cumpli cu nan obligacionnan financiero.

 

 

Top