Debi n’e silencio di Minister Mike de Meza y di Director di Aviacion Civil, Edwin Kelly Dirigencia di InselAir ta sigui culpa Aruba cu e avionnan MD ta grounded na Aruba Mester busca e falta serca Secretario di Estado Sharon Dijksma

Tabata diarazon ultimo, cu gerencia di InselAir, encabesa pa su CEO nobo, Gilles Filiatreault a haya ta bon pa acusa Aruba di e falta cu te ainda e avionnan MD di InselAir, ta grounded na Aruba, loke ta ser considera hasta como un boycott contra di InselAir.

Un declaracion masha ridiculo, pasobra si e por a sigui e ultimo desaroyonan, tabata e Secretario di Estado cu ta atende e.o. asunto di Aviacion, Sharon Dijksma a duna di conoce den un conferencia di prensa na Aruba cu lo laga Inspectornan Hulandes bin haci un evaluacion, y mientrastanto e avionnan MD ta keda grounded.

 

E CEO Gilles Filiatreault a bisa di ta masha desapunta, y cu Aruba ta busca algo pa tene e avionnan di InselAir na tera.

Na Aruba, nos kier p’e avionnan por bula, pasobra mas tempo na tera, ta perdida so e compania lo sufri. Pero si e CEO bin cu declaracionnan asina, siendo cu e mester sa mihor, ta candela e ta benta riba candela.

 

Nos di AWEMainta, ta lamenta posicion tuma dor di gerencia di InselAir pa tin un pensamento eroneo asina, pero p’esaki nos tin cu culpa Minister di Transporte, Mike de Meza, kende hunto su Director di Aviacion Civil, Edwin Kelly, ta mantene un silencio hermetico y como tal gerencia di InselAir ta kere cu nan por poepoe riba Aruba.

Momento a yega pa nan bin dilanti, y defende e politica di aviacion di Aruba, pero splica tambe kico Hulanda su Inspectornan ta haciendo.

 

Aruba no tin motibo pa haci dificil, pa te hasta acusa Aruba di ta boycoteando InselAir. Lo contrario, Aruba ta considera InselAir un partner di su turismo.

Pa hasta bisa cu pa motibo di un debe cu InselAir tin cu Gobierno, ta otro motibo pa mantene e avionnan di InselAir na tera. Ridiculo!!!

 

Ta di spera cu Minister Mike de Meza of Edwin Kelly bin afo, y defende Aruba, pa pone un paro n’ee hendenan cu ta papia un cantidad di disparati, sin wak nan cara den nan propio spiel.

Pero Gilles Filiatreault ta na direccion robez. Dirigi bo mes na Hulanda p/a Sharon Dijksma y puntr’e ki dia nan ta keda cla cu e inspeccionnan pa por release e MD-nan.

 

Top