Delaster siman di inscripcion: Competencia Hubenil “Gang di Arte Aruba 2017 cu tema oficial “Caya”

Diabierna awor dia 7 di juli 2017, t’e delaster dia di inscripcion pa loke ta trata e Competencia Hubenil Gang di Arte Aruba 2017. E proyecto aki ta dirigi na hobennan entre 13 te cu 21 aña di edad cu ta interesa den arte y kier forma parti di e programa vacacional cu ta ser ofreci completamente gratis y cu ta wordo coordina pa Departamento di Cultura Aruba.

Hobennan por partcipa sea individualmente of den un grupo di maximo 5 persona p’asina profila nan talento artistico den e.o. baile, musica, canto, dominio di instrumento, teatro, arte di palabra, arte visual, audio visual, cine, deporte creativo y mas.

 

E programa ta dividi den 5 fase cu ta tuma lugar na instalacion nobo di nos Plaza Libertador Betico Croes.

Un audicion tipo entrevista, riba dia 12, 13 y 14 di juli, na unda e hobennan individual of den grupo mester presenta dilanti di un cuerpo di maestro, ya sea cu un improvisacion of algo liber prepara (no mara na tema) p’e participantenan por mustra den cual disciplina artistico nan ta interesa pa sigi desaroya nan talento y mustra e tecnica di e arte cu nan ta domina y cu nan ta interesa di participa pa e grandioso nochi final, cu ta programa pa tuma lugar dia 10 di augustus 2017 na Cas di Cultura Aruba.

 

Despues di esaki lo reuni cu mayornan pa entrega e plan di accion planifica pa tuma lugar dia 17 di juli 2017. Cuerpo di maestro lo continua cu guia y acesoramento pedagogico y artistico como preparacion di obranan cu cada hoben mes ta crea di nan mes idea y originalidad.

Den e siman entre 17 te cu 25 di juli, lo tin tayernan pa yuda e hobennan yega na nan propio obra original na base di e interpretacion di e tema oficial pa e edicion number 11 cu ta “Caya”.

Despues di esaki e hobennan mester presenta dilanti di cuerpo di maestro pa di dos biaha cu e obra final pa loke ta trata e competencia.

Maestronan lo duna conseho di mehoracion pa termina e producto final, cu mester ta cla pa presenta pa delaster biaha cu tur aspecto tecnico den un generale repetitie na Cas di Cultura.

 

Esaki ta tuma lugar dia 9 di augustus 2017, cu ta un dia prome cu e presentacion final.

Finalmente e hobennan lo presenta nan obra dilanti di un cuerpo di hurado y publico general. E final lo tuma luga na 10 di augustus 2017 na Cas di Cultura y ta completamente gratis, pa famia y amistadnan por bin sostene nos hobennan den nan talento.

Despues di competencia e hobennan participante lo disfruta di un dia di excurcion cu un intercambio hunto cu otro hobennan di nos islanan ruman Corsou y Bonaire. Asina nos ta celebra e excelente trabou haci y fortalece e lasonan di amistad, manera un Gang positivo pa continua cu arte y tambe pa motivanan pa sigui cu e mesun amor pa arte cu mester reina den cada hoben artista nan curason.

 

Tur hoben participante lo haya un recuerdo di participacion y ganadornan lo haya oportunidad di representa Aruba den intercambio artistico hubenil cu paisnan di Reino Hulandes.

Pa incripcion, por busca un formulario di inscripcion na Departamento di Cultura Aruba situa den e edificio di DA na boulevard, of tambe por haci esaki riba facebook “Gang di Arte Aruba” y manda bo infomacion n’e link cu ta aparece.

Pa mas informacion por tuma contacto libremente cu sr. Freddy Montoya na number: 565-6903 of cu sra. Julie Merencia na number: 743-7414

 

Top