Delegacion Arubano a biaha pa e Weganan Olimpico di Rio de Janeiro 2016

Dialuna merdia, gran parti di e delegacion Arubano a viaha pa Rio de Janeiro, Brasil, unda cu dentro di algun dia lo inicia e celebracion deportivo mas grandi na mundo, esta e Weganan Olimpico 2016.

Na aeropuerto, un grupo di famia, amigo y conocirnan como tambe miembronan di e directiva di COA y e federacionnan deportivo di e deportenan encuestion a bin despedi di e delegacion. Presidente di COA, sr. Edwin Roos den nomber di tur presente a desea henter e delegacion un bon biahe pa Rio.

E delegacion cu a realisa e biahe tabata e atletanan di landamento, Allyson Ponson y Mikel Schreuders, e atleta di taekwondo Monica Pimentel, coach di landamento Ismael Santiesteban como tambe miembronan di comision tecnico di COA, Alberto Thiel y Edmundo Josiah, e masahista Mike Goeloe y por ultimo redactor deportivo di COA, Seever Krozendijk.

Mester bisa cu e atletanan Philipine van Aanholt, Nicole van der Velden y Thijs Visser di sailing hunto cu Jayme Mata di judo hunto cu nan respectivo coachnan como tambe Hefe di Mision, Patrick Werleman y e secretario general di COA, Nicole Hoevertsz ya ta na Rio en espera di e delegacion cu lo sali for di Aruba.

Comite Olimpico Arubano y Aruba completo kier a desea e atletanan, coachnan, e staf di Team Aruba tur clase di exito durante di e Weganan Olimpico di Rio 2016.

Diabierna awo, 5 di augustus, lo tuma luga e Ceremonia di Apertura di e Weganan Olimpico den e mahestuoso stadion di Maracana. Nos delegacion di Aruba lo forma parti di e ceremonia y desfile como e number 13.

Top