Den asunto di refineria y CAFT, MEP ta bolbe demostra nan Incapacidad y Insinceridad Acepta berdad y realidad no ta cumbini MEP, segun Rene Herde

“Aña 2016 tabata e aña cu MEP a wordo caracterisa pa nan ausencia sistematico. Fraccion di MEP a haya e nomber di “Parlamentarionan di warda”, pasobra nunca nan tur ta bay trabou.

Ora un ta bay cas e otro ta yega. MEP a hasta keda sin presenta cu henter e fraccion dia cu e ex-Gobernador a tuma despedida y ora e Gobernador nobo a asumi su funcion.

Ora di trata e presupuesto di cada Minister na november, MEP nunca tabata presente cu henter e fraccion.

Dia cu Oficina di Turismo a bin duna cuenta pa desaroyo di turismo algun siman pasa, niun miembro di MEP tabata presente. E tabata e aña di NO BAY TRAHA di MEP”, segun observacion di drs. Rene (Baba) Herde, Vice Presidente di Parlamento.

 

2017

Aña 2017 ta parce di ta bay bira e aña di incapacidad y insinceridad di MEP. Apenas e aña a habri y MEP ta demostrando con nan ta bay sigui troce e berdad, crea impresionnan robez, purba bruha tera y sigui desea pa algo bay malo pa nan haya co’i papia.

Apenas e aña a habri cu atrobe MEP ta purba crea e impresion cu cos ta bay malo cu e apertura di e refineria of cu tin trato prefenrencial den tumamento di hende na trabou den e refineria.

 

Di acuerdo cu Rene Herde, aparentemente MEP ta lubida cu e refineria ta wordo maneha pa un compania priva. Cu no ta Gobierno ta maneha e refineria.

Pero e ta tarea di Gobierno pa percura p’e refineria cumpli cu leynan di nos pais y cumpli cu e contract cu nan a firma.

Ta esey e Ministernan mas envolvi a declara bon cla e siman aki. Pero pa MEP e berdad ey no ta conta.

Bruha tera ta mihor cu papia berdad, pasobra berdad no ta cumbini MEP!

 

“Pesey nos lo mester sigui tolera e trocemento di berdad y creacion di fantasianan totalmente incorecto di MEP.

Aparentemente MEP no tin e capacidad pa mustra pueblo kico nan lo haci’e mihor ni con nan lo haci esey. Nan ta obliga pa recori na mentira y insinuacionnan sin fin”, segun drs. Rene Herde.

 

Un otro ehempel t’e carta cu CAFT aparentemente a laga sali den publicidad pa ekibocacion. Apesar di a lesa e carta y di ta consciente cu aki no ta trata di un conseho, pero di un peticion pa mas informacion pa por traha nan conseho, tog MEP ta purba crea e impresion di cu e aña aki si finansa ta bay ta for di sla.

MEP y CAFT tin tres aña consecutivo ta canta e mes un storia y ta grita cu ta bay tuma medida. E tres añanan cu a pasa, Gobierno di AVP a haci net lo contrario: A cumpli e presupuesto den e normanan palabra, a bahe e deficit y a haci esey sin tuma niun medida!

 

Al contrario, Gobierno a sigui inverti den forsa di compra, den cuida esnan di menos entrada, den cuida e pensioennan y den inverti den enseñansa y infrastructura.

Cu CAFT no ta wak esey ta dimes. Nan no ta interesa den kico ta sosode den comunidad. Pero cu e partido MEP cu ta representa parti di nos pueblo ta sigui desea Aruba malo y pidi pa tuma medida manera MEP mes a haci, ta increibel.

Pero e ta demostra un biaha mas nan incapacidad pa sikiera presenta mihor solucion pa cualkier tema y nan insinceridad den splica con nos pais ta desaroyando.

Den e aña di eleccion aki nos no por spera nada mihor di MEP, segun Vice Presidente di Parlamento, drs. Rene Herde.

Top