Den caso di traficacion di hende, Ministerio Publico a demanda castigo masha abao

WILLEMSTAD – Ayera, diabièrnè 29 sèptèmber 2017, Corte na Còrsou a trata e caso conoci como “Bandera Grill” cu 3 sospechoso: W. la R., (doño Bandera Grill), A.S. (beheerder Bandera Grill) y R. la R. (Inspector di Polis).

Ta trata di un caso na unda Ministerio Público (OM) di Còrsou ta acusá e sospechosonan di ta co-autor (medeplegen) den traficacion di hende cu 1 victima, e dama B.C.C. di Venezuela.

 

Contra W. la R. tin tambe e acusacion di menasa y contra R. la R. tambe haci maluso di su funcion como Polis.

E dama victima a entregá un daño perhuicio di 50.000 florin. E ta bisa cu el a bin Còrsou na òctober 2016 pa traha como “trago-meisje” den Bandera Grill.

 

Na Còrsou e gerente W. la R. y beheerder A.S. di Bandera Grill a oblig’e pa drenta tambe den trabou di prostitucion. El a nenga esey y eynan e problemanan a cuminsa p’e.

Esaki, segun Fiscal, ta un forma di oprimi y abusá di trahador.

Un caso pues di traficacion di hende na unda ta buscá damanan di afo y bou di engaño ta lòk nan pa bin nos isla pa haci otro trabou.

 

Fiscal di Ministerio Público a haci un demanda ayera contra e sospechosonan: W. la R. (1963): 6 luna completamente condicional y 2 aña proeftijd

Contra A.S. (1974); 3 luna completamente condicional y “verbeurd verklaren” di su auto, un SUV, cu a keda confisca pa motibo cu el a usa esaki pa transporta e victima y 2 aña proeftijd.

Pa R. la R. 1962); 6 luna completamente condicional, 2 aña proeftijd y 3 aña “ontzetting uit ambt” como Polis.

Huez ta duna su veredicto aki 3 siman den e caso aki.

Leave a Reply

Top