Den caso masha traumatico, Corte a kita yiu (10) for di mama pa tata hibé Surnam

WILLEMSTAD – Diasabra ultimo Corte di Husticia Komun a kita un yiu for di su mama y a ordená e mama pa regla tur papel pa diasabra mes e tata Surinameño retorna su pais cu e yiu muher.
E pareha tabata casá, pero a divorciá relativamente rapido na Sürnam caminda e menor di edad tabata biba serca e tata y su mama di crianza.
Dia 26 di decèmber e muher a bin Corsou cu vakansi cu pèrmit di e tata, pero estando na Corsou el a cumpra ticket pa nan bay Hulanda sin pèrmit di e homber.

Corte a huzga cu e manera cu e señora a hiba e yiu Hulanda via Corsou ta practicamente secuestro y a ordená e muher pa regla tur papel y paga gastonan cu e homber a haci pa bay busca su yiu na Hulanda.
Esey tabata culminacion mama di un bataya legal entre e mayornan pa bira tutor di e yiu.
Originalmente e señora mester a prepará e yiu pa bay Sürnam cu su tata for di 8 di maart, pero e señora a apelá e decision pa finalmente pèrdè e caso siman pasá.
Ademas e mester paga su èx pareha € 4.923,51 directamente.

E situacion aki ta consecuensia di un relacion amoroso for di cual e mucha muher a nace.
Tantu e homber como e muher tin nacionalidad Hulandes siendo di origen Surinameño y Curasoleño respectivamente.
Despues cu e mucha a nace e pareha cu tabata biba cu otro y no a casa.
Nan tabata biba na Hulanda, pero e homber a retorná su pais pa atendé su asuntonan y dia promé di febrüari 2013 e pareha a casa na Sürnam.
Un aña y mei despues nan a divorciá y Corte a nombra ambos como tutor di e mucha.

Luna di decèmber ultimo e muher a bay Hulanda cu e mucha sin pèrmit di e homber y for di Hulanda el a manda informá e hòmber cu e no ta bay Sürnam bèk, pero cu e homber por bin busca e yiu.
Aña nobo 2017 e homber a baha na Schiphol, pero e muher a bisé cu e yiu no kier bay Sürnam bèk, pero kier keda biba serca e otro yiunan di e muher.
Di manera cu e menor di edad ta na Hulanda for di 28 di decèmber aña pasá.
E tata a bay Corte inmediatamente pa pidi Corte ordená e muher pa duné e yiu y e paga un boet pa di 500 euro pa cada dia cu e keda sin entregá e yiu.

Y pa culminá e revancha el a pidi Corte p’e muher paga tur gasto di e caso.
Di acuerdo cu leynan cu ta goberná traslado ilegal (secuestro) di menornan di edad, Corte a ordená cu mester retorná e mucha pa Sürnam y pa e mama paga e gastonan di biahe y estadia.

Top