Den colaboracion cu Develop to Grow: Loving Guidance ta organisa training di 7 dia na Aruba

Tur aña Loving Guidance, e desaroyador di Disciplina Consciente, ta organisa su Institute unda cu mayornan, educadornan y maestronan ta bay mas profundo den loke ta Disciplina Consciente. Esaki ta e di dos biaha cu e training di 7 dia tuma lugar na Aruba, e prome Conscious Discipline Institute tabata exclusivamente pa Aruba y a wordo organisa y financia via Ministerio di Educacion.

 

E biaha aki e training a wordo organisa pa Loving Guidance den colaboracion cu Develop to Grow y a yama bon bini na participante tanto di Aruba como di otro pais den caribe.

Asina a duna oportunidad na un grupo di educador y mayor den region Caribe participa y bin siña con pa desaroya disciplina den mucha y hoben di tur edad.

Durante e 7 dia di training aki ta pasa den e principionan Brain Smart cu ta yuda adulto crea un cultura di educacion y crecemento cu ta yuda mucha desaroya confiansa y ta crea conexion positivo.

Tambe ta bay den profundidad rib’e facetanan di e cerebro di un mucha cu ta hunga un rol principal den nan capacidad di siña riba plano emocional, social y academico.

Na e manera aki Loving Guidance ta traha pa logra yuda mucha rond di ful mundo tin e oportunidad di ricibi educacion pa un miho futuro y sobrepasa stress causa dor di problemanan social, cognitivo, of di desaroyo cu ta afecta nan situacion di cas.

 

Un delegacion internacional a yega durante weekend pa asisti na e Instituto na Renaissance Convention Center, for di e. o. Merca, Suriname, Grenada, Trinidad, Santo Domingo, Bonaire, Saba, Puerto Rico, Corsou y Colombia.

Loving Guidance ta celebrando su di binti aña di exsistencia y a dicidi duna e region caribe un regalo dor di ofrece oportunidad di scholarship pa participantenan den Caribe.

Un total di 25% di e participantenan cu a atende a ricibi e scholarship aki for di Loving Guidance y ta bini di Aruba, Suriname y Grenada.

 

Un danki ta bay na Minister di Educacion Michelle Hooyboer Winklaar cu tabata presente pa e apertura oficial di Conscious Discipline Institute, e team di Develop to Grow y tur boluntarionan cu a bini di varios diferente destinacion pa yuda haci e training aki un exito.

 

Pa mas informacion riba workshop y charla tocante Disciplina Consciente na Aruba por sigui e pagina di Develop to Grow na www.facebook.com/developtogrow of email info@developtogrow.com.

Top