Den luna di maart Riangela Flanegin y Rudlyn Ras a sali pa Hulanda pa join Hoofddorp Pioniers den Silver League

Aruba Softball Bond su atletanan ta sigui crusa frontera. Recientemente den luna di maart dos top atletanan di Aruba Softball Bond den secion femenino, esta Riangela Flanegin y Rudlyn Ras a sali pa Hulanda pa incorpora nan mes den e ekipo di Hoofddorp Pioniers den Silver League y pues un liga di un nivel halto na Hulanda.

 

Riangela Flanegin y Rudlyn Ras ta dos atleta cu a melita semper den Aruba Bank Lady Tigers y a hiba e ekipo aki na multiple campeon den AA aki na Aruba.

Tambe ta dos estelar den seleccion di Aruba. Den Silver League na Hulanda tin 12 ekipo cu lo bataya desde april y na september lo conoce e campeon di Hulanda.

Ekiponan miembro di KNBSB y cu lo melita den Silver League ta Alcmaria Victrix, Amsterdam Pirates, Ban Topa Future Stars, Birds, Centrals, Euro Stars, Gryphon, Hoofddorp Pioniers, HCAW, Onze Gezellen, Roef y UVV. E ekiponan aki lo hunga 2 buelta contra otro.

 

Mesun sistema cu Aruba a hunga ultimo añanan esta bo lo hunga un double header mesun dia contra mesun team tur ora cu bo tin wega. Di e manera aki tambe ta garantisa mas wega, mas hungador lo hunga y bo ta implementa y forsa equiponan traha mas pitcher cual ta un parti hopi importante di softball.

Riangela Flanegin y Rudlyn Ras a ricibi un oportunidad unico pa melita den e Liga aki competiendo cu e mihornan di Hulanda.

 

Endy Croes presidente di ASB y henter e directiva di Aruba Softball Bond ta sumamente contento y orguyoso cu mas atleta a sigui desaroya creando asina oportunidadnan unico pa hunga riba nivelnan halto den campeonatonan oficial den exterior.

ASB ta desea Riangela Flanegin y Rudlyn Ras tur clase di éxito. Carga e bandera di bo pais cu tur dignidad estrechando boso hala poniendo esaki briya na tur momento.

Leave a Reply

Top